തിരുവനന്തപുരം: സംസ്ഥാനത്ത് ഹയര് സെക്കന്ററി പ്രവേശനത്തിന്റെ സമയക്രമം പുതുക്കി ഉത്തരവിറങ്ങി. പ്ലസ് വണ് ട്രയല് അലോട്ട്മെന്റ് ഈ മാസം 28 ന് നടക്കും. ആദ്യ അലോട്ട് മെന്റ് പട്ടിക ഓഗസ്റ്റ് മൂന്നിന് പ്രസിദ്ധീകരിക്കുകയും ചെയ്യും. ക്ലാസുകള് ഓഗസ്റ്റ് 22നു തുടങ്ങും. സിബിഎസ്ഇ, ഐ സി എസ് സി വിദ്യാര്ത്ഥികളുടെ പത്താം ക്ലാസ് പരീക്ഷാ ഫലം വരാന് വൈകിയതാണ് ഹയര് സെക്കന്ററി പ്രവേശനം നീളാന് കാരണം. ഫലം വരാത്ത സാഹചര്യത്തില് പ്ലസ് വണ് പ്രവേശനത്തിനുള്ള സമയം നീട്ടണമെന്ന് ആവശ്യപ്പെട്ട് സി ബി എസ് ഇ വിദ്യാര്ത്ഥികള് ഹൈക്കോടതിയെ സമീപിച്ചിരുന്നു. ഇതോടെ പ്ലസ് വണ് സീറ്റിലേക്ക് അപേക്ഷിക്കാന് ഇന്ന് വരെ ഹൈക്കോടതി സമയം അനുവദിക്കുകയും ചെയ്തു.
ഇത് അടിസ്ഥാനമാക്കിയാണ് പ്രവേശനത്തിനുള്ള മറ്റ് നടപടികളുടെ സമയക്രമം സംസ്ഥാന പൊതു വിദ്യാഭ്യാസ വകുപ്പ് പരിഷ്കരിച്ചത്. പ്ലസ് വണ് പ്രവേശനത്തിന് അപേക്ഷ നല്കാനുള്ള അവസാന തീയ്യതി ഇക്കഴിഞ്ഞ 18 നായിരുന്നു. എന്നാല് ജൂലൈ 22 ന് കേസ് പരിഗണിച്ചപ്പോള് ഫലം പ്രഖ്യാപിച്ചതായി സിബിഎസ്ഇ അധികൃതര് കോടതിയെ അറിയിച്ചു. എന്നാല് അപേക്ഷ സമര്പ്പിക്കാന് കൂടുതല് സമയം വേണമെന്ന കുട്ടികളുടെ ആവശ്യം കോടതി അംഗീകരിച്ചാണ് ഇന്ന് വൈകീട്ട് 5 മണിവരെ സമയം നീട്ടി നല്കിയത്.
