കണ്ണൂര് : പോക്സോ കേസിലെ പ്രതിയെ വിടാതെ പിന്തുടര്ന്ന് മര്ദ്ദനം. ഇരയുടെ പിതാവ് ഉള്പ്പെടെ ഏഴുപേര്ക്കെതിരെ പോലീസ് കേസെടുത്തു. തന്നെ പല തവണ ഇരയുടെ പിതാവും സുഹൃത്തുക്കളും മര്ദ്ദിച്ചതായി റിമാന്ഡില് കഴിയുന്ന പ്രതി ജയില് അധികൃതര്ക്ക് നല്കിയ പരാതിയിലാണ് പയ്യന്നൂര് പോലീസ് കേസെടുത്തത്. പയ്യന്നൂര് കോളോത്തെ ടി.കെ മനോജിന്റെ പരാതിയിലാണ് പോക്സോ കേസിലെ ഇരയുടെ പിതാവും ഇയാളുടെ നിര്ദ്ദേശപ്രകാരം മറ്റു സുഹൃത്തുക്കളും സിമന്റ് ഗോഡൗണില് ബലമായി കൂട്ടി കൊണ്ടു പോയി മര്ദ്ദിച്ചുവെന്നാണ് പരാതി.
ഇതിനു ശേഷം മറ്റിടങ്ങളില് നിന്നും മര്ദ്ദിച്ചതായും കുറ്റാരോപിതന് തന്റെ പരാതിയില് പറയുന്നു. പുതുതായി ട്യൂഷന് സെന്റര് തുടങ്ങാനുള്ള പദ്ധതി നടപ്പിലാക്കാന് കഴിയാത്തതിന്റെ വൈരാഗ്യമാണ് മര്ദ്ദനത്തിന് പിന്നിലെന്നാണ് പരാതി. ജയില് അധികൃതര് പരാതി പയ്യന്നൂര് പോലീസിന് കൈമാറിയതിനെ തുടര്ന്നാണ് പോലീസ് കേസെടുത്ത് അന്വേഷണമാരംഭിച്ചത്.
