കൊച്ചി : ആറ് പോക്സോ കേസുകളില് ഇരയായതിന് പിന്നാലെ ആത്മഹത്യ ചെയ്ത പെണ്കുട്ടിയുടെ മാതാവിന് പോലിസ് സംരക്ഷണം നല്കാന് കേരള ഹൈക്കോടതി ഉത്തരവിട്ടു. പെണ്കുട്ടിയുടെ ആത്മഹത്യയുമായി ബന്ധപ്പെട്ട കേസുകളുടെ ഭാഗമായി മാതാവ് നല്കിയ പോലിസ് സംരക്ഷണ ഹര്ജി അനുവദിച്ച കോടതി പോലിസ് മേധാവി, വനിതാ ശിശു വികസന വകുപ്പ് സെക്രട്ടറി, ചൈല്ഡ് വെല്ഫെയര് കമ്മിറ്റി എന്നിവര്ക്ക് നോട്ടീസ് അയച്ചു.
പ്രതികളെല്ലാം ജാമ്യത്തില് പുറത്തുള്ള സാഹചര്യത്തിലാണ് മാതാവ് പോലീസ് സംരക്ഷണം തേടി കോടതിയെ സമീപിച്ചത്. പോലിസ് സംരക്ഷണം ആവശ്യപ്പെട്ടുള്ള മാതാവിന്റെ അപേക്ഷ പരിഗണിയ്ക്കുവാനും, ആവശ്യപ്പെടുമ്പോഴെല്ലാം സംരക്ഷണം നല്കാനും ജസ്റ്റിസ് അനു ശിവരാമന് ഇടക്കാല ഉത്തരവില് നിര്ദേശിച്ചു. കേരള ലീഗല് സര്വ്വീസസ് അതോറിറ്റിയ്ക്ക് കീഴിലെ വിക്ടിം റൈറ്റ്സ് സെന്ററിന്റെ കോര്ഡിനേറ്ററാണ് മാതാവിന് വേണ്ടി ഹാജരായത്.
