കുറ്റിപ്പുറം : വാഹനങ്ങള് മോഷ്ടിക്കുന്ന യുവാവിനെ കുറ്റിപ്പുറം പോലീസ് പിടികൂടി. കോയമ്പത്തൂര് സുന്ദരപുരം കാമരാജ് നഗര് സ്വദേശി ഷമീറി (42)നെയാണ് പിടികൂടിയത്. ചോലവളവിലുള്ള സ്ഥാപനത്തില് നിര്ത്തിയിട്ട പിക് അപ് മോഷ്ടിച്ചയാളെയാണ് ആലത്തൂര് പോലീസിന്റെ സഹായത്തോടെ പിടികൂടിയത്. മോഷ്ടിച്ച വാഹനം തമിഴ്നാട്ടിലേക്ക് കടത്താന് ശ്രമിക്കവെ വാളയാര് ഭാഗത്ത് നിന്നാണ് ഇയാള് പിടിയിലായത്. മലപ്പുറം, പാലക്കാട് ജില്ലകളില് നിന്നായി 30ലധികം പിക് അപ്പുകള് ഒന്നര മാസത്തിനിടയില് മോഷ്ടിക്കപ്പെട്ട സംഭവവുമായി ബന്ധപ്പെട്ട് ഊര്ജിതമായ അന്വേഷണം നടക്കുന്നതിനിടക്കാണ് കഴിഞ്ഞ ദിവസം രാത്രി ചോലവളവിലെ സ്ഥാപനത്തില് നിന്ന് വാഹനം മോഷണം പോയത്.
സമീപ ജില്ലകളിലെ പോലീസുമായി സഹകരിച്ച് തെരച്ചില് നടത്തുന്നതിനിടെ ആലത്തൂരില് നിന്നും വാഹനം കളവ് പോയതായി വിവരം ലഭിച്ചിരുന്നു. പാലക്കാട് പോലീസുമായി നടത്തിയ സംയുക്ത പരിശോധനയിലാണ് മോഷണവാഹനവുമായി ഇയാള് പിടിയിലായത്. ഇതോടെ സംഘത്തിലെ പ്രധാന കണ്ണികളിലേക്ക് എത്തിപ്പെടാനാകുമെന്ന പ്രതീക്ഷയിലാണ് പോലീസ്. പ്രതിയെ കോടതിയില് ഹാജരാക്കി റിമാന്ഡ് ചെയ്തു.
