മൂവാറ്റുപുഴ : പുതുതായി നിർമ്മിച്ച പോലീസ് സ്റ്റേഷൻ കെട്ടിടത്തിന്റെ ഉദ്ഘാടനം 25 ന് രാവിലെ 11 ന് മുഖ്യമന്ത്രി പിണറായി വിജയൻ ഓൺലൈനിലൂടെ നിർവ്വഹിക്കും. പോലീസ് സ്റ്റേഷൻ കെട്ടിടം ജില്ലാ പോലീസ് മേധാവി കെ. കാർത്തിക്ക് സന്ദർശിച്ചു. 845 ചതുരശ്ര മീറ്ററിൽ രണ്ടു നിലകളിലായാണ് കെട്ടിടം ഉയരുന്നത്.
ആധുനിക സൗകര്യങ്ങൾ സ്റ്റേഷനിലുണ്ടാകും. പ്രത്യേക വിസിറ്റേഴ്സ് റൂം, ക്യാന്റീൻ, ഉദ്യോഗസ്ഥർക്ക് വിശ്രമമുറികൾ എന്നിവ ഒരുക്കിയിട്ടുണ്ട്. സ്ത്രീകൾ, പുരുഷന്മാർ, ഭിന്നലിംഗക്കാർ എന്നിവർക്ക് പ്രത്യേക സെല്ലുകൾ സ്റ്റേഷന്റെ പ്രത്യേകതയാണെന്ന് ജില്ലാ പോലീസ് മേധാവി കെ. കാർത്തിക്ക് പറഞ്ഞു. 2 കോടി 95 ലക്ഷം രൂപയാണ് കെട്ടിടത്തിന്റെ നിര്‍മ്മാണച്ചിലവ്‌.
