കോഴിക്കോട് : ദേശീയപാതയിലെ ടോൾ പ്ലാസകളിൽ പണം നൽകാതെ കടന്നുപോകുന്ന വാഹനങ്ങൾക്കെതിരെ കർശന നടപടിയുമായി പോലീസ്. കോഴിക്കോട് ദേശീയപാത ബൈപ്പാസിലെ ടോൾ പ്ലാസയിൽ ടോൾ വെട്ടിച്ച് പോകുന്ന വാഹനങ്ങളുടെ വിവരങ്ങൾ നേരിട്ട് ട്രാഫിക് പോലീസിന് കൈമാറിത്തുടങ്ങി. നിയമലംഘകരെ കണ്ടെത്തി പിഴ ചുമത്തുന്ന നടപടികളും ശക്തമാക്കിയിട്ടുണ്ട്. ഇന്നലെ മാത്രം ടോൾ അടയ്ക്കാതെ കടന്നുപോയ 86 വാഹനങ്ങളുടെ വിവരങ്ങളാണ് പൊലീസിന് കൈമാറിയത്. ഇന്ന് ഉച്ചയ്ക്ക് ഒരു മണിവരെ 32 വാഹനങ്ങളും ടോൾ നൽകാതെ പ്ലാസ കടന്നതായി അധികൃതർ അറിയിച്ചു.
ടോൾ ഫീസ് നൽകാതെ യാത്ര തുടരുന്ന വാഹനങ്ങൾക്കെതിരെ ട്രാഫിക് പോലീസ് 1,000 രൂപ പിഴ ഈടാക്കുന്നുണ്ട്. നിയമം ലംഘിക്കുന്നവരിൽ ഭൂരിഭാഗവും കാറുകളാണെന്നാണ് അധികൃതർ വ്യക്തമാക്കുന്നത്. ടോൾ നൽകാത്ത വാഹനങ്ങൾ നേരിട്ട് തടഞ്ഞുനിർത്തിയാൽ പലപ്പോഴും ജീവനക്കാരുമായി തർക്കങ്ങളും സംഘർഷങ്ങളും ഉണ്ടാകുന്ന സാഹചര്യത്തിലാണ് അത്തരം വാഹനങ്ങളെ തടയുന്ന നടപടി ജീവനക്കാർ അവസാനിപ്പിച്ചത്. എന്നാൽ ഇതേ തുടർന്ന് ടോൾ വെട്ടിച്ച് കടന്നുപോകുന്നവരുടെ എണ്ണം വർധിച്ചതായാണ് ടോൾ അധികൃതരുടെ വിലയിരുത്തൽ.
