കൊച്ചി : പോപ്പുലര് ഫിനാന്സ് തട്ടിപ്പ് കേസിലെ പ്രതി തോമസ് ദാനിയേലിന് (റോയി) ജാമ്യം നല്കാന് പാടില്ലെന്നും ഇപ്പോള് നല്കിയ ഇടക്കാല ജാമ്യം റദ്ദാക്കണമെന്നും പി.ജി.ഐ.എ ഹൈക്കോടതിയോട് ആവശ്യപ്പെട്ടു. റിമാന്റ് കാലാവധി അവസാനിക്കുകയും പുതിയ അപേക്ഷ നല്കാതിരിക്കുകയും ചെയ്ത സാഹചര്യത്തിലാണ് കഴിഞ്ഞദിവസം തോമസ് ദാനിയേലിന് കോടതി ഇടക്കാല ജാമ്യം അനുവദിച്ചത്. ജാമ്യാപേക്ഷയിലുള്ള അന്തിമവാദം നടന്നുകൊണ്ടിരിക്കുകയാണ്.
കേസ് ഇന്ന് കോടതിയുടെ പരിഗണനക്ക് വന്നപ്പോഴാണ് നിക്ഷേപകര്ക്ക് വേണ്ടി ന്യൂട്ടന്സ് ലോ അഭിഭാഷകരായ മനോജ് വി.ജോര്ജ്ജ്, രാജേഷ് കുമാര് ടി.കെ എന്നിവര് തോമസ് ദാനിയേലിന്റെ ജാമ്യ ഹര്ജിയില് കക്ഷി ചേരണമെന്ന ആവശ്യം ഉന്നയിച്ചത്. തുടര്ന്ന് ജാമ്യാപേക്ഷയില് കക്ഷി ചേരുവാനുള്ള അനുവാദം കോടതി നല്കി. ഇതോടെ പി.ജി.ഐ.എയുടെ വാദങ്ങള്ക്കൂടി പരിഗണിച്ചായിരിക്കും തോമസ് ദാനിയേലിന് ജാമ്യം ലഭിക്കുക. ഇതുവരെ ഇന്ഫോഴ്സ്മെന്റ് ഡയറക്ടറേറ്റ് മാത്രമായിരുന്നു എതിര്കക്ഷികള്.
