മല്ലപ്പള്ളി : മല്ലപ്പള്ളി കെ.എസ്.ഇ.ബി സെക്ഷന് പരിധിയിലെ പ്രദേശങ്ങളില് വൈദ്യുതി മുടക്കം പതിവാകുന്നു. പ്രദേശത്ത് പകലും രാത്രിയിലും വൈദ്യുതി ലഭിക്കാതെ നാട്ടുകാരും വ്യാപാരികളും ബുദ്ധിമുട്ടിലാണ്. മല്ലപ്പള്ളി, കൊട്ടാങ്ങല്, ആനിക്കാട്, കുന്നന്താനം, കവിയൂര്, കല്ലൂപ്പാറ, പുറമറ്റം, എഴുമറ്റൂര്, കൊറ്റനാട് എന്നീ പ്രദേശങ്ങളിലാണ് പതിവായി വൈദ്യുതി മുടങ്ങുന്നത്. വൈദ്യുതി മുടക്കത്തിന് പരിഹാരം കാണണമെന്ന് നാട്ടുകാര് പലതവണ ആവശ്യപ്പെട്ടിട്ടും യാതൊരു നടപടിയും ഉണ്ടാകുന്നില്ല.
മിനിറ്റുകളുടെ വ്യത്യാസത്തിലാണ് വൈദ്യുതി മുടങ്ങുന്നത്. പകല് സമയങ്ങളിലുള്ള വൈദ്യുതി മുടക്കം വ്യാപാര സ്ഥാപനങ്ങളെയുള്പ്പെടെ ബാധിക്കുന്നുണ്ട്. ത്രി ഫെയ്സ് ലൈനുകള് ഉള്ള പ്രദേശങ്ങളില് രണ്ട് ലൈനുകളില് വൈദ്യുതിയുണ്ടെങ്കില് ഒരു ലൈനില് വൈദ്യുതി ഇല്ലാത്ത അവസ്ഥയാണ്. കാരണം അന്വേഷിച്ച് സെക്ഷന് ഓഫീസില് വിളിച്ചാല് കൃത്യമായ മറുപടിയും ഉപഭോക്താക്കള്ക്ക് ലഭിക്കാറില്ല. പ്രദേശത്ത് വോള്ട്ടേജ് ക്ഷാമവും രൂക്ഷമാണ്. കെ.എസ്.ഇ.ബി അധികാരികളുടെ ഈ അനാസ്ഥക്ക് എതിരെ കടുത്ത പ്രതിഷേധത്തിലാണ് ഉപഭോക്താക്കള്.
