കോന്നി : കോന്നിയിലും സമീപ പ്രദേശങ്ങളിലും ഇറച്ചിക്കും മീനിനും തോന്നിയപോലെ വിലയീടാക്കുന്നതായി വ്യാപക പരാതി. പോത്തിറച്ചി – 500, മത്തി – 400, കോഴി ഇറച്ചി – 170 എന്നിങ്ങനെയാണ് പല കടകളിലും ഈടാക്കുന്നത്. എന്നാല് കോന്നിയുടെ സമീപപ്രദേശങ്ങളില് പോത്തിറച്ചി – 380, മത്തി – 280, കോഴിയിറച്ചി – 130 എന്നിങ്ങനെയാണ് വില. മീനിന്റെ ലഭ്യത കുറഞ്ഞതിനാലാണ് വില കൂടിയത് എന്നാണ് കച്ചവടക്കാര് പറയുന്നത്. ഇത്രയധികം വില കൊടുത്തിട്ട് പൊതു ജനങ്ങള്ക്ക് ലഭിക്കുന്നതാകട്ടെ വയര് പൊട്ടിയ മീനും. ഇത് വീട്ടില് കൊണ്ടുവന്ന് പാചകം ചെയ്യാന് നോക്കിയാല് ഒന്നിനും കൊള്ളുകയുമില്ല.
മിക്ക കടകളിലും കോഴിയിറച്ചിക്ക് ഉള്പ്പെടെ അമിത വിലയാണ് വാങ്ങുന്നത്. ലീഗല് മെട്രോളജി ഓഫീസും ഭക്ഷ്യ സുരക്ഷാ ഓഫീസും പ്രവര്ത്തിക്കുന്ന കോന്നിയിലാണ് ഈ പകല്ക്കൊള്ള നടക്കുന്നത്. ഈ രണ്ട് ഓഫീസിലെയും ഉദ്യോഗസ്ഥര് ഈ വിഷയത്തില് യാതൊരു നടപടിയും സ്വീകരിക്കുന്നില്ല. വൈകുന്നേരങ്ങളില് പഴകിയതും ചീഞ്ഞതുമായ മത്സ്യങ്ങള് വിറ്റഴിച്ചാല് പോലും ആരും ചോദിക്കാനില്ലാത്ത അവസ്ഥയാണ് കോന്നിയില്. നടപടി എടുക്കേണ്ട കോന്നി ഗ്രാമ പഞ്ചായത്തും മൌനം പാലിക്കുകയാണ്. മത്സ്യ മാംസാദികളുടെ വില്പ്പനയില് ഗ്രാമ പഞ്ചായത്ത് അടിയന്തിരമായി ഇടപെടണമെന്നും ജനങ്ങളെ സംഘം ചേര്ന്ന് കൊള്ളയടിക്കുന്ന നടപടി എത്രയുംവേഗം അവസാനിപ്പിക്കണമെന്നും കോന്നി നിവാസികള് ആവശ്യപ്പെടുന്നു.
