തിരുവനന്തപുരം: പി എസ് സി പരീക്ഷകള് ഇനി മുതല് രണ്ട് ഘട്ടമായി നടത്തും. ആദ്യഘട്ടത്തില് സ്ക്രീനിങ് ടെസ്റ്റ് നടത്തും. ഇതില് വിജയിക്കുന്നവര് രണ്ടാംഘട്ട പരീക്ഷയ്ക്ക് യോഗ്യത നേടുമെന്ന് ചെയര്മാന് എം കെ സക്കീര് വാര്ത്താ സമ്മേളനത്തില് അറിയിച്ചു. നീട്ടിവെച്ച പരീക്ഷകള് സെപ്തംബര് മുതല് നടത്തും. അപേക്ഷ ക്ഷണിച്ച തസ്തികകളിലേക്കുള്ള പരീക്ഷകള് ഡിസംബര് മുതല് ആരംഭിക്കും. അപേക്ഷകള് കൂടുതലായി വരുന്ന തസ്തികകള്ക്കായിരിക്കും പുതിയ പരിഷ്കരണം ബാധകമാവുക. രണ്ടാംഘട്ടത്തില് തസ്തികയ്ക്ക് അനുസരിച്ചാവും ചോദ്യങ്ങള്. പരീക്ഷാരീതി മാറുന്നതോടെ രണ്ടാംഘട്ട പരീക്ഷയ്ക്ക് എത്തുന്നവര് മികവുള്ളവരാകുമെന്നും കഴിവുള്ളവര് നിയമനത്തിന് യോഗ്യത നേടുമെന്നും ചെയര്മാന് പറഞ്ഞു.
പത്താംക്ലാസ്, പ്ലസ്ടു, ബിരുദ യോഗ്യതകളുള്ള തസ്തികള്ക്ക് വെവ്വേറെ തലത്തിലുള്ള പരീക്ഷകളായിരിക്കും ഉണ്ടായിരിക്കുക. സ്ക്രീനിങ് ടെസ്റ്റിലെ മാര്ക്ക് അന്തിമ റാങ്ക് ലിസ്റ്റിനെ ബാധിക്കില്ല. മെയിന് പരീക്ഷയ്ക്ക് തസ്തികയ്ക്ക് അനുസൃതമായ ചോദ്യങ്ങള് ഉണ്ടാകും. നേരത്തെ റാങ്ക് ലിസ്റ്റുകളില് ഉള്പ്പെട്ട ഉദ്യോഗാര്ഥികള്ക്ക് അവകാശപ്പെട്ട നിയമനം ഇതുവരെ നല്കിയിട്ടുണ്ട്. കെഎഎസ് പ്രിലിമിനറി ഫലം വൈകാതെ പ്രസിദ്ധീകരിക്കുമെന്നും ചെയര്മാന് അറിയിച്ചു.
