ഖത്തർ : ഒമാനിലെ ഖസബ് തുറമുഖത്ത് എണ്ണക്കപ്പലിന് നേരെ ഇറാൻ നടത്തിയ ആക്രമണത്തെ അപലപിച്ച് ഖത്തർ. ഒമാനിലെ വാണിജ്യ തുറമുഖമായ ദുഖും പോർട്ടിനെ ലക്ഷ്യമിട്ട് ഇറാൻ നടത്തിയ ആക്രമണത്തെയും ഖത്തർ അപലപിച്ചു. ആക്രമണം ഒമാനിന്റെ പരമാധികാരത്തിന് മേലുള്ള കടന്നുകയറ്റമാണെന്നും മധ്യസ്ഥ ശ്രമങ്ങളിൽ സജീവ പങ്ക് വഹിച്ച രാജ്യത്തിനെയും ലക്ഷ്യം വയ്ക്കുന്നത് ഭീരുത്വമെന്നും ഖത്തർ വിദേശകാര്യ മന്ത്രാലയം വ്യക്തമാക്കി.
എണ്ണക്കപ്പലിൽ 15 ഇന്ത്യൻ പൗരന്മാരും 5 ഇറാൻ പൗരന്മാരുമായിരുന്നു ഉണ്ടായിരുന്നത്. ഒമാൻ സമുദ്ര സുരക്ഷാ കേന്ദ്രം ഇടപെട്ടാണ് ജീവനക്കാരെ രക്ഷിച്ചത്. ഒമാൻ തീരത്ത് വീണ്ടും ആക്രമണം ഉടലെടുക്കുകയാണ്. ദുഖും തുറമുഖത്ത് പാർപ്പിട സമുച്ചയത്തിൽ രണ്ട് ഇടങ്ങളിലായാണ് ഡ്രോൺ ആക്രമണം ഉണ്ടായത്. ഡ്രോണുകളിൽ ഒന്ന് തൊഴിലാളികളുടെ താമസ കേന്ദ്രത്തിലേക്ക് പതിക്കുകയായിരുന്നു.ആക്രമണത്തിൽ പ്രവാസിയായ ഒരു തൊഴിലാളിക്ക് പരുക്കേറ്റു.
