ഫറോക്ക് : യാത്രക്കാരെ വലച്ച് ഫറോക്ക് റെയിൽവേ സ്റ്റേഷനിലേക്കുള്ള വഴി ചെളിക്കുളം. രണ്ടാം പ്ലാറ്റ്ഫോമിലേക്കുള്ള റോഡിലാണ് ചെളി നിറഞ്ഞത്. വാഹനങ്ങൾ പ്ലാറ്റ്ഫോമിനടുത്തെത്താൻ ബുദ്ധിമുട്ടുകയാണ്. ഫറോക്ക് – കരുവൻ തിരുത്തി – ചാലിയം തീരദേശ റോഡിൽനിന്നും രണ്ടാം പ്ലാറ്റ് ഫോമിലേക്ക് എത്താൻ എളുപ്പമാണ്. വാഹനങ്ങൾക്ക് അടുത്തെത്താൻ കഴിയാത്തതിനാൽ ഏറെ ദൂരം ചുറ്റി ഫറോക്ക് ടൗൺ വഴി റെയിൽവേ സ്റ്റേഷനിലെത്തി വീണ്ടും മേൽപ്പാലത്തിലൂടെ കടന്നു വേണം രണ്ടാം പ്ലാറ്റ് ഫോമിലെത്താൻ. സ്കൂൾ തുറന്നതോടെ വിദ്യാർഥികൾ ഏറെ പ്രയാസപ്പെടുകയാണ് ഇതുവഴി സഞ്ചരിക്കാൻ. പരിഹാരം കാണാൻ റെയിൽവേ അധികൃതർ ശ്രമിക്കുന്നില്ലെന്നാണ് നാട്ടുകാരുടെ ആക്ഷേപം.
