തിരുവനന്തപുരം : ജോസ് കെ മാണി രാജിവെച്ചതിനെ തുടര്ന്ന് കേരളത്തില് ഒഴിവു വന്ന രാജ്യസഭാ സീറ്റ് കേരള കോണ്ഗ്രസിന് തന്നെ നല്കിയേക്കും. യുഡിഎഫ് വിട്ടു വന്ന എല്ജെഡിയോട് കാണിച്ച കീഴ്വഴക്കം ഇത്തവണയും തുടരാനാണ് ധാരണ. അന്തിമ തീരുമാനം ഇടതുമുന്നണി യോഗം കൈക്കൊള്ളുമെന്ന് എല്.ഡി.എഫ് കണ്വീനര് എ.വിജയരാഘവന് വ്യക്തമാക്കി.
രാജ്യസഭയിലേക്ക് വീണ്ടും മല്സരിക്കുമോ എന്ന കാര്യത്തില് ജോസ് കെ മാണി ഇതുവരെ നിലപാട് വ്യക്തമാക്കിയിട്ടില്ല. ജോസിന് പകരം പാര്ട്ടിയിലെ മുതിര്ന്ന നേതാക്കളില് ആരെയെങ്കിലും മല്സരിപ്പിക്കണമെന്ന അഭിപ്രായം ഉയര്ന്നിട്ടുണ്ട്. സ്റ്റീഫന് ജോര്ജ്ജിന്റെ അടക്കം പേരുകളാണ് ഉയര്ന്നു വന്നിട്ടുള്ളത്. നിയമസഭ തെരഞ്ഞെടുപ്പില് മത്സരിക്കുന്നതിന് വേണ്ടി കഴിഞ്ഞ ജനുവരി 11 നാണ് ജോസ് കെ മാണി രാജ്യസഭാംഗത്വം രാജിവെച്ചത്. ഈ ഒഴിവിലേക്ക് നവംബര് 29 ന് തെരഞ്ഞെടുപ്പ് നടത്താനാണ് ഇലക്ഷന് കമ്മീഷന് തീരുമാനിച്ചത്. വോട്ടെണ്ണലും അന്നുതന്നെ നടക്കും. നവംബര് 16 ആണ് നാമനിര്ദേശ പത്രിക സമര്പ്പിക്കാനുള്ള അവസാനതീയതി. നവംബര് 17ന് സൂക്ഷ്മ പരിശോധന. 22 വരെ പത്രിക പിന്വലിക്കാം.
