റാന്നി : റാന്നി പുതിയ പാലത്തിന്റെ ഭാഗമായി വണ്വെ നടപ്പിലാക്കുന്നതിനായി തിരഞ്ഞെടുത്ത അപ്രോച്ച് റോഡ് തകര്ന്നു കിടക്കാന് തുടങ്ങിയിട്ടു നാളുകളായി. പെരുമ്പുഴ, രാമപുരം ബ്ലോക്കുപടി വണ്വെ റോഡാണ് തോടിന്റെ രൂപത്തിലായത്.
റാന്നി പഞ്ചായത്തിന്റെ അധീനതയിലുള്ള റോഡാണ് പെരുമ്പുഴ മുതല് ബ്ലോക്കുപടി വരെ തകര്ന്നു കിടക്കുന്നത്. വണ്വേക്ക് വേണ്ടി മൂന്ന് വര്ഷം മുമ്പ് നടപടി തുടങ്ങിയതിനാല് പഞ്ചായത്ത് ഈ റോഡ് കയ്യൊഴിഞ്ഞു. രാമപുരം മുതല് ബ്ലോക്ക് പടിവരെ പഞ്ചായത്ത് ടാറിംങ്ങും കോണ്ക്രീറ്റും ചെയ്ത് ഗതാഗതത്തിന് സൗകര്യം ഒരുക്കിയിരുന്നു. ഇപ്പോള് ടാറിംങ്ങും കോണ്ക്രീറ്റും ഇളകി താറുമാറായി. റോഡിനുവേണ്ടി അളന്നു തിരിച്ച് കല്ലിട്ട ഭാഗങ്ങള് പലരും കയ്യെറിക്കഴിഞ്ഞു.
ബ്ലോക്ക് പടി ജംഗ്ഷനില് റോഡിന്റെ സംഗമ സ്ഥാനത്തുനിന്ന് അകത്തേക്ക് മാറി, കുരിശിന് സമീപത്താണ് കൈയ്യേറ്റം. റവന്യൂവകുപ്പ് അളന്ന് തിരിച്ച സ്ഥലം സമീപവാസി കമ്പി വേലികെട്ടി തിരിച്ചെടുത്തു. പുതിയ പാലം വരുന്നതോടെ ടൗണിലെ ഗതാഗത കുരുക്കൊഴിവാക്കാന് സമാന്തരമായി വികസിപ്പിക്കാന് തീരുമാനിച്ച റോഡാണിത്. ഇതിനായി ബ്ലോക്കുപടി മുതല് രാമപുരം വരെ 10 മീറ്റര് വീതിയില് റോഡിനായി സ്ഥലം അളന്നു തിരിച്ചിരുന്നു. സര്വ്വേ നടപടികള് പൂര്ത്തിയായെങ്കിലും നോട്ടിഫിക്കേഷന് നടപടികള് പൂര്ത്തിയായിട്ടില്ല.
ഇതുപോലെ പാലത്തിന് സമീപവും കൈയ്യേറ്റ ശ്രമം നടന്നിരുന്നു. അന്ന് അധികൃതര് ശക്തമായി ഇടപെട്ടതിനാല് കയ്യേറ്റശ്രമം പരാജയപ്പെടുകയായിരുന്നു. സ്ഥലം ഏറ്റെടുക്കാന് വൈകിയതു മൂലം കരാര് കമ്പനി പാലം നിര്മ്മാണം നിര്ത്തി വെച്ചിരുന്നു. പണി നടക്കില്ലെന്നു കരുതിയാവാം കൈയ്യേറ്റം എന്നാണ് കരുതുന്നത്. ഇപ്പോള് പാലം നിര്മ്മാണം പൂര്ണ്ണമായും കിഫ്ബി ഏറ്റടുത്തതിനു ശേഷവും പണി നിര്ത്തിവെച്ചിരിക്കുകയാണ്.
