പൂന്തുറ : പതിനാറുകാരിയെ കാറിനുള്ളില്വെച്ച് പീഡിപ്പിക്കാന് ശ്രമിച്ച കേസില് ബീമാപള്ളി സ്വദേശിയെ പൂന്തുറ പോലീസ് അറസ്റ്റുചെയ്തു. ബീമാപള്ളി ബീമാമാഹീന് സ്കൂളിനു സമീപം താമസിക്കുന്ന ഷാജി (52) യെ ആണ് അറസ്റ്റുചെയ്തത്. വീട്ടില്നിന്ന് പിണങ്ങിയിറങ്ങിയശേഷം കഴിഞ്ഞ മാസം ബീമാപള്ളിയില് കഴിയുകയായിരുന്ന വിദ്യാര്ഥിനിയോട് ഷാജി വിവരങ്ങള് ചോദിച്ചറിഞ്ഞശേഷം വീട്ടില് കൊണ്ടുവിടാമെന്ന് പറഞ്ഞ് കാറില് കയറ്റി. 1000 രൂപ യാത്രാ ചെലവിനായി നല്കാമെന്നും പറഞ്ഞു.
തുടര്ന്ന് ആഭ്യന്തര വിമാനത്താവളത്തിനടുത്തുള്ള ലോഡ്ജിനടുത്ത് കാര് നിര്ത്തി പുറത്തിറങ്ങാനാവശ്യപ്പെട്ടു. അപകടം മനസ്സിലാക്കിയ വിദ്യാര്ഥിനി ഇറങ്ങിയോടാന് ശ്രമിച്ചപ്പോള് കാറിനുള്ളില്വെച്ച് ഇയാള് ശരീരത്തില് കയറിപ്പിടിച്ചു. ഇതോടെ വിദ്യാര്ഥിനി കാറില്നിന്ന് ഇറങ്ങിയോടി. തുടര്ന്ന് ബസ് കയറി ചവറയിലുള്ള കൂട്ടുകാരിയുടെ വീട്ടിലെത്തി. ശാസ്താംകോട്ട പോലീസില് വിവരമറിയിച്ചതിനെത്തുടര്ന്ന് പോലീസ് രക്ഷിതാക്കളെ വിളിച്ചുവരുത്തിയശേഷം കേസ് പൂന്തുറ പോലീസിനു കൈമാറി. കഴിഞ്ഞദിവസം പൂന്തുറ പോലീസെത്തി ഇയാളെ അറസ്റ്റുചെയ്യുകയായിരുന്നു. കോടതി പ്രതിയെ റിമാന്ഡ് ചെയ്തു.
