തൃത്താല : പട്ടാമ്പിയില്‍ പോലീസ് ചമഞ്ഞ് അഞ്ചംഗ സംഘം 20കാരിയെ പീഡിപ്പിക്കാന്‍ ശ്രമിച്ചു. പാലക്കാട് കൊല്ലങ്കോട് സ്വദേശിനിക്ക് നേരെയാണ് അതിക്രമമുണ്ടായത്. പട്ടാമ്പിയിലെ സ്വകാര്യ ലോഡ്ജിലായിരുന്നു സംഭവം. സംഘത്തില്‍ പെട്ട മൂന്ന് പേരെ അറസ്റ്റ് ചെയ്തു. മെയ് രണ്ടിനാണ് 20കാരി ആണ്‍സുഹൃത്തിനൊപ്പം ലോഡ്ജില്‍ താമസത്തിനെത്തുന്നത്. മെയ് നാലിന് തൊട്ടടുത്ത മുറിയില്‍ താമസിച്ചിരുന്ന അഞ്ചംഗ സംഘം പോലീസ് ആണെന്ന് പറഞ്ഞ് യുവതിയെയും യുവാവിനെയും ഭീഷണിപ്പെടുത്തി പണം ആവശ്യപ്പെട്ടു. തുടര്‍ന്ന് സംഘം പെണ്‍കുട്ടിയെ മാനഭംഗപെടുത്താനും തട്ടിക്കൊണ്ട് പോകാനും ശ്രമിച്ചു. സംഭവത്തില്‍ യുവതി തൃത്താല പോലീസില്‍ പരാതി നല്‍കി.
പോലീസ് ചമഞ്ഞ് പണം തട്ടാന്‍ ശ്രമം, മാനഭംഗപെടുത്താന്‍ ശ്രമം, തട്ടിക്കൊണ്ട് പോകാന്‍ ശ്രമം എന്നീ വകുപ്പുകള്‍ പ്രകാരം തൃത്താല പോലീസ് കേസെടുത്തു. പെണ്‍കുട്ടി പട്ടികജാതി വിഭാഗത്തില്‍ പെട്ടതിനാല്‍ ഷൊര്‍ണൂര്‍ ഡി വൈ എസ് പി. വി സുരേഷിനാണ് അന്വേഷണ ചുമതല. സംഘത്തിലെ വല്ലപ്പുഴ സ്വദേശി അബ്ദുല്‍ വഹാബ്, മട്ടാഞ്ചേരി സ്വദേശി സജു കെ സമദ്, തൃശൂര്‍ സ്വദേശി മുഹമ്മദ് ഫാസില്‍ എന്നിവരെ കഴിഞ്ഞ ദിവസം തൃത്താല പോലീസ് വിവിധ ഇടങ്ങളില്‍ നിന്നായി അറസ്റ്റ് ചെയ്തിരുന്നു. ഇവര്‍ റിമാന്‍ഡിലാണ്. മറ്റു രണ്ട് പ്രതികള്‍ക്കായി അന്വേഷണം തുടരുകയാണ്.
