റാന്നി : പ്രളയത്തിൽ തകർന്ന കുളിക്കടവുകളുടെ പുനരുദ്ധാരണ ജോലികൾ തുടങ്ങി. കടവിൻ്റെ ശോച്യാവസ്ഥ പരിഹരിക്കുന്നത് സംബന്ധിച്ച്, വാർഡ് അംഗവും നാട്ടുകാരും പരാതി നല്കിയിരുന്നു. പമ്പാനദിയിലെ പഴവങ്ങാടി ഗ്രാമപഞ്ചായത്തിലെ ഐത്തല കോണമലകടവ് പുനരുദ്ധാരണ നിർമ്മാണ ജോലികളാണ് ആരംഭിച്ചത്. ഇതിനായി ജലവിഭവ വകുപ്പിൽ നിന്ന് 10 ലക്ഷം രൂപ അനുവദിച്ചാണ് നിർമ്മാണ പ്രവർത്തനം നടത്തുന്നത്. വർഷങ്ങൾക്ക് മുൻപ് ഗ്രാമ പഞ്ചായത്തിന്റെ കടത്തു കടവായിരുന്നു കോണമലകടവ്.
മുപ്പതുമീറ്ററിലധികം നീളവും 3 മീറ്റർ വീതിയിൽ ഉള്ള ഈ കടവ് കരിങ്കൽ പളികൾ കൊണ്ടാണ് നിർമ്മിച്ചിരുന്നത്. ഈ പടികൾ തുടർച്ചയായി ഉണ്ടാകുന്ന വെള്ളപ്പൊക്കത്തെ തുടർന്ന് പൂർണമായും തകർന്നിരുന്നു. മുൻ പഴവങ്ങാടി പഞ്ചായത്ത് പ്രസിഡന്റ് ബോബി എബ്രഹാം അന്നത്തെ എം ൽ എ രാജു എബ്രഹാമിന് നൽകിയ നിവേദനത്തെ തുടർന്നാണ് ജലവിഭവ വകുപ്പിൽ നിന്നും തുക അനുവദിച്ചത്. വേനൽക്കാലം ആയതോടെ നിരവധി ആളുകൾ ആശ്രയിക്കുന്ന കടവിനെ ഫണ്ട് അനുവദിച്ചിട്ടും, നടപടികൾക്ക് കാലതാമസം നേരിട്ടതിനെ തുടർന്ന് നിലവിലെ വാര്ഡംഗവും നാട്ടുകാരും നല്കിയ പരാതിയെ തുടർന്നാണ് കടവ് പുനരുദ്ധാരണം ആരംഭിച്ചത്.
