കോന്നി : തണ്ണിത്തോട് മണ്ണീറ മധ്യ വയസ്കനെ തൂങ്ങി മരിച്ച നിലയിൽ കണ്ടെത്തിയ സംഭവത്തിൽ ദുരൂഹത ആരോപിച്ച് ബന്ധുക്കൾ രംഗത്ത്. സംഭവത്തിൽ മകൻ പത്തനംതിട്ട ജില്ലാ പോലീസ് മേധാവിക്ക് പരാതി നൽകി. മണ്ണീറ മാമൂട്ടിൽ സഹദേവ(68)നെ ആണ് കഴിഞ്ഞ 24ന് തൂങ്ങി മരിച്ച നിലയിൽ കണ്ടെത്തുന്നത്. തുടർന്ന് രണ്ടാം ദിവസം ഇദ്ദേഹത്തിന്റ സംസ്കാരം നടക്കുകയും ചെയ്തിരുന്നു. എന്നാൽ സംഭവത്തിൽ ദുരൂഹത ഉണ്ടെന്ന് കാണിച്ച് മകൻ സതീഷ് ആണ് പത്തനംതിട്ട ജില്ലാ പോലീസ് മേധാവിക്ക് പരാതി നൽകിയിട്ടുള്ളത്.
സതീഷിന്റെ ജേഷ്ഠനും പിതാവും ഒന്നിച്ചാണ് ഇവിടെ താനസിച്ചിരുന്നത്. മരണം നടക്കുന്നതിന് തൊട്ടുമുൻപുള്ള ദിവസം ഇവിടെ നിന്ന് നിലവിളിയും ഒച്ചയും വഴക്കും കേട്ടതായി അയൽവാസികൾ സതീഷിനോട് പറഞ്ഞിരുന്നു. തുടർന്ന് കൊല്ലം ജില്ലയിലെ അഞ്ചലിൽ താമസിക്കുന്ന സതീഷ് ഈ വിവരം തണ്ണിത്തോട് പോലീസിൽ അറിയിച്ചിരുന്നെന്നും പിന്നെ അച്ഛൻ മരിച്ച വിവരമാണ് താൻ അറിയുന്നതെന്നും പരാതിയിൽ പറയുന്നു. സംഭവത്തിൽ ദുരൂഹത ഉണ്ടെന്നും അന്വേഷണം നടത്തണം എന്നും ആവശ്യപെട്ടാണ് ജില്ലാ പോലീസ് മേധാവിക്ക് മകൻ പരാതി നൽകിയിരിക്കുന്നത്.