തിരുവനന്തപുരം : ബ്രൂവറി ഡിസ്റ്റിലറി അഴിമതിക്കേസില് വിജിലന്സ് കോടതി ആവര്ത്തിച്ച് ആവശ്യപ്പെട്ടിട്ടും രേഖകള് ഹാജരാക്കാതെ സര്ക്കാര് ഒളിച്ചു കളിക്കുകയാണെന്ന് കോണ്ഗ്രസ് നേതാവ് രമേശ് ചെന്നിത്തല. കഴിഞ്ഞ പിണറായി സര്ക്കാര് ബ്രൂവറി അനുവദിക്കുന്നതില് അബ്കാരികളെ സഹായിക്കാന് ചട്ടവിരുദ്ധമായാണ് അനുമതി നല്കിയതെന്നും ഇതില് അഴിമതിയുണ്ടെന്നും ചൂണ്ടിക്കാട്ടിയാണ് ചെന്നിത്തല പരാതി നല്കിയത്.
ഈ ഹര്ജിയിലാണ് പ്രത്യേക വിജിലന്സ് കോടതി രേഖകള് ആവശ്യപ്പെട്ടത്. അഴിമതി കയ്യോടെ പിടിക്കപ്പെടുമെന്ന ഭയമാണ് രേഖകള് ഹാജരാകാത്തതിന്റെ പിന്നിലെന്ന് ചെന്നിത്തല പറഞ്ഞു. ഈ കേസില് മൊഴി നല്കാന് മുന്മന്ത്രിമാരായ ഇ.പി. ജയരാജനോടും വി.എസ്.സുനില് കുമാറിനോടും കോടതി ആവര്ത്തിച്ച് ആവശ്യപ്പെട്ടിട്ടും ഇന്നും കോടതിയില് ഹാജരാവാത്തത് അന്വേഷണത്തെ ഭയമുള്ളതു കൊണ്ടാണെന്നും ചെന്നിത്തല അഭിപ്രായപ്പെട്ടു.
