റാന്നി : പെരുന്തേനരുവി ജലവിതരണ പദ്ധതിയിലെ സംഭരണിയുടെ കിണറിലെ ചെളി നീക്കുന്ന ജോലികള്ക്ക് തുടക്കമായി. മോട്ടോര് ഉപയോഗിച്ചാണ് ചെളി നീക്കുന്നത്. ഇതുമൂലം പമ്പിംഗ് കുറച്ചു ദിവസത്തേക്ക് തടസപ്പെടുവാന് സാധ്യതയുണ്ട്. ഇന്നു രാവിലെ മുതലാണ് കിണറില് അടിഞ്ഞ ചെളി നീക്കുന്ന ജോലികളാരംഭിച്ചത്. 2018ലെ മഹാപ്രളയത്തില് അടിഞ്ഞ ചെളി ഒരു വര്ഷം മുന്പു നീക്കം ചെയ്തിരുന്നെങ്കിലും കഴിഞ്ഞ മഴക്കാലത്ത് വീണ്ടും ചെളി നിറയുകയായിരുന്നു. ഇതുമൂലം കിണറിന്റെ ആഴം കുറഞ്ഞതു കൊണ്ടു പലതവണ പമ്പിംങ് മുടങ്ങുകയും ചെയ്തിരുന്നു.
നദിയില് നിന്നും കിണറിലേക്ക് വെള്ളം എത്തിക്കുന്ന പൈപ്പിലെ ചെളിയും ചേമ്പറിലെ തടസവും ഒരുമാസം മുമ്പ് നീക്കം ചെയ്തിരുന്നു. അതോടെ പമ്പിംങ് പൂര്ണ്ണതോതില് ആരംഭിച്ചിരുന്നെങ്കിലും കിണറിന്റെ സംഭരണ ശേഷി കുറഞ്ഞത് ആശങ്കയിലാക്കിയിരുന്നു. കൂടാതെ പമ്പിംങ് സമയത്ത് വെള്ളത്തിനൊപ്പം ചെളി കയറി മോട്ടോറുകള് തകരാറിലാവുകയും ചെയ്തിരുന്നു. വേനല് കടുത്തതോടെ വെള്ളത്തിന്റെ ഉപയോഗം വര്ദ്ധിച്ചതോടെ പൂര്ണ്ണതോതില് പമ്പിംങ് തുടരുവാന് വേണ്ടിയാണ് ചെളി ഇപ്പോള് നീക്കുന്നത്.
