ഈരാറ്റുപേട്ട : നഗരസഭ ട്രാഫിക് കമ്മിറ്റിയുടെ തീരുമാനപ്രകാരം അനധികൃത കച്ചവടവും റോഡ് കൈയേറ്റവും ഒഴിപ്പിക്കാന് എത്തിയ നഗരസഭ ജീവനക്കാരും വഴിയോര ക്കച്ചവടക്കാരും തമ്മില് വാക്കേറ്റം. സംഭവസ്ഥലത്തെത്തിയ ഇടതു കൗണ്സിലര്മാരും വഴിയോരക്കച്ചവടക്കാരും ചേര്ന്ന് നഗരസഭ ജീവനക്കാരെയും പോലീസിനെയും തടഞ്ഞു.
എം.എല്.എയുടെ സാന്നിധ്യത്തില് സി.പി.എം കൗണ്സിലര്മാരുടെ പിന്തുണയോടെ എടുത്ത തീരുമാനമാണ് അനധികൃത കച്ചവടം ഒഴിവാക്കുക എന്നതെന്ന് ചെയര്പേഴ്സന് സുഹറ അബ്ദുല് ഖാദര് പറഞ്ഞു. നഗരസഭയില് ഒരുമിച്ചു തീരുമാനമെടുക്കുകയും വെളിയില് വന്ന് എതിര്ക്കുകയും ചെയ്യുന്ന സി.പി.എം രീതി ഇരട്ടത്താപ്പാണെന്നും ചെയര്പേഴ്സന് ആരോപിച്ചു.
ഒഴിപ്പിക്കുന്ന സ്ഥലത്ത് ഹൈമാസ്റ്റ് ലൈറ്റ് സ്ഥാപിക്കാനാണ് നഗരസഭ തീരുമാനം. ലൈറ്റ് സ്ഥാപിക്കാന് കോണ്ക്രീറ്റിങ് നടത്തിയതായും ചെയര്പേഴ്സന് പറഞ്ഞു. മാര്ക്കറ്റ്റോഡില് എതാനും പേരുടെ കൈയേറ്റങ്ങള് കാരണം കാല്നടക്കാര്ക്കും വാഹനങ്ങള്ക്കും സഞ്ചരിക്കാന് ബുദ്ധിമുട്ടാണ്. കൈയേറ്റം ഒഴിപ്പിക്കാന് ഉടന് നടപടിയെടുക്കണമെന്ന് നാട്ടുകാര് ആവശ്യപ്പെട്ടു.