കൊച്ചി : മോഡലുകളുടെ മരണവുമായി ബന്ധപ്പെട്ട് അറസ്റ്റിലായ സൈജു തങ്കച്ചനെതിരെ കൂടുതല് തെളിവുകളുമായി അന്വേഷണസംഘം. പ്രതി കാട്ടുപോത്തിനെ വേട്ടയാടിയതായി സംശയമുണ്ടെന്നും കാട്ടുപോത്തിനെ കൊന്ന് കറിവെച്ചതിനെക്കുറിച്ചുള്ള സന്ദേശങ്ങള് ലഭിച്ചതായും അന്വേഷണ ഉദ്യോഗസ്ഥര് വ്യക്തമാക്കി. അന്വേഷണ സംഘം കോടതിയില് സമര്പ്പിച്ച കസ്റ്റഡി അപേക്ഷയിലാണ് ആരോപണമുള്ളത്. സംഭവത്തില് കൂടുതല് അന്വേഷണം വേണമെന്ന് അന്വേഷണ സംഘം വ്യക്തമാക്കി.
സൈജുവിന്റെ സുഹൃത്തുക്കളുമായുള്ള ചാറ്റിലാണ് ഈ വിവരമുള്ളത്. മൂന്നാറിലെ ഡിജെ പാര്ട്ടിയില് ഇയാള് മയക്കുമരുന്ന് വിതരണം ചെയ്തിട്ടുണ്ടെന്നും അന്വേഷണ സംഘം കണ്ടെത്തി. മൂന്നാറില് വിതരണം ചെയ്തത് എംഡിഎംഎയാണെന്ന് സൈജു സമ്മതിച്ചെന്നും അന്വേഷണ സംഘം കോടതിയെ അറിയിച്ചു. ഇതിനെക്കുറിച്ച് കൂടുതല് അന്വേഷണം വേണമെന്നും ആവശ്യപ്പെട്ടിട്ടുണ്ട്. സൈജുവിനെ മൂന്ന് ദിവസം കൂടെ പോലീസ് കസ്റ്റഡിയില് വിട്ടു.
