കോന്നി : ജില്ലയിലെ നദികളിൽനിന്ന് മണൽവാരൽ അടിയന്തിരമായി പുനഃരാരംഭിക്കണമെന്ന് ജില്ലാ ഹെഡ് ലോഡ് ആൻഡ് ജനറൽ വർക്കേഴ്സ് യൂണിയൻ സിഐടിയു ജില്ലാ സമ്മേളനം ആവശ്യപ്പെട്ടു. പമ്പ, അച്ചൻകോവിലാറുകളിൽ വൻതോതിലാണ് മണലുള്ളത്. പതിറ്റാണ്ടിലേറെയായി തുടരുന്ന മണൽവാരൽ നിരോധനം നീക്കുന്നതോടെ ആയിരക്കണക്കിന് തൊഴിലാളികൾക്കാണ് തൊഴിലവസരമുണ്ടാകുന്നത്. പാറഖനനം പുനഃരാരംഭിക്കാനും നടപടി വേണമെന്നും സമ്മേളനം ആവശ്യപ്പെട്ടു.
പി ഉദയഭാനു നഗറിൽ (കോന്നി ശബരി ഓഡിറ്റോറിയം) പ്രതിനിധി സമ്മേളനം ചുമട്ടുതൊഴിലാളി ക്ഷേമ ബോർഡ് ചെയർമാൻ ആർ രാമു ഉദ്ഘാടനം ചെയ്തു. യൂണിയൻ ജില്ലാ പ്രസിഡന്റ് കെ സി രാജഗോപാലൻ അധ്യക്ഷത വഹിച്ചു. സിഐടിയു ജില്ലാ സെക്രട്ടറി പി ബി ഹർഷകുമാർ, ടി ഡി ബൈജു, പി ജെ അജയകുമാർ, കെ യു ജനീഷ്കുമാർ എംഎൽഎ എന്നിവർ സംസാരിച്ചു. സ്വാഗതസംഘം ചെയർമാൻ ശ്യാംലാൽ സ്വാഗതവും കൺവീനർ എം എസ് ഗോപിനാഥൻ നന്ദിയും പറഞ്ഞു.
