തിരുവനന്തപുരം : ഇന്ത്യ എ ടീമിനെ നയിക്കുന്നത് വെല്ലുവിളിയായി കാണുന്നുവെന്ന് ക്യാപ്റ്റന് സഞ്ജു സാംസണ്. ഈ മാസം 28ന് കാര്യവട്ടം സ്പോര്ട്ട്സ് ഹബ്ബില് ( ഗ്രീന്ഫീല്ഡ് സ്റ്റേഡിയം) നടക്കുന്ന ഇന്ത്യ-ദക്ഷിണാഫ്രിക്ക ടി20 ക്രിക്കറ്റ് മത്സരത്തിന്റെ ടിക്കറ്റ് വില്പനയുടെ ഉദ്ഘാടന ചടങ്ങില് പ്രസംഗിക്കുകയായിരുന്നു അദ്ദേഹം.
പുതിയ ടീമാണ്. ആ വെല്ലുവിളി മറികടക്കാന് കഴിയുമെന്ന പൂര്ണവിശ്വാസമുണ്ട്. ന്യുസിലന്ഡ് നല്ല ടീമാണ്. നന്നായി കളിക്കണം. പരമാവധി റണ് നേടുകയാണു തന്റെ ലക്ഷ്യം. ചൊവ്വാഴ്ച ടീമിനൊപ്പം ചേര്ന്ന് പരിശീലനം ആരംഭിക്കും. ഇന്ത്യന് ടീമില് എല്ലാവരും കൂട്ടുകാരാണ്. അവര്ക്ക് കേരളത്തില് വരാന് ഇഷ്ടമാണ്. നാട്ടുകാരില്നിന്ന് ഇത്ര വലിയ പിന്തുണ പ്രതീക്ഷിച്ചില്ല. അവരുടെ പിന്തുണയിലാണ് കളിക്കുന്നത്. എനിക്കുവേണ്ടി സംസാരിക്കുമ്പോള് സന്തോഷമുണ്ട്. ഇന്ത്യന് സീനിയര് ടീമില് ഇടമില്ലാത്തതിനെക്കുറിച്ച് സമൂഹമാധ്യമങ്ങളില് നടക്കുന്ന പ്രചാരണങ്ങള് കണ്ടു. അത് ആവേശത്തില് പറയുന്നതാണ്.
ഗ്രീന് ഫീല്ഡിലെ കളി ഞാനും കാണും. ഉയര്ന്ന സ്കോര് പിറക്കുന്ന കളിയുണ്ടാകട്ടെ. ബൗളര്മാരെ ബഹുമാനത്തോടെയാണു സമീപിക്കുന്നത്. ചിലപ്പോള് ആരെറിഞ്ഞാലും ഔട്ടാകും. പരമാവധി റണ് അടിക്കുകയാണു ലക്ഷ്യമെന്നും സഞ്ജു പറഞ്ഞു.