തിരുവനന്തപുരം : കേരളത്തിൽ കോൺഗ്രസ് സർക്കാർ അധികാരത്തിലെത്തുന്നതിന് മുൻപ് തിരഞ്ഞെടുപ്പ് പ്രചാരണത്തിലെ പ്രധാന വാഗ്ദാനങ്ങളിലൊന്നായിരുന്നു കെഎസ്ആർടിസി ബസുകളിൽ സ്ത്രീകൾക്ക് സൗജന്യ യാത്ര അനുവദിക്കുമെന്നത്. അധികാരത്തിലെത്തിയ ശേഷം ഈ വാഗ്ദാനം നടപ്പാക്കുമോയെന്ന ചർച്ചകൾ വ്യാപകമായിരുന്നു. നിരവധി മാസങ്ങളായുള്ള ആലോചനകൾക്കും ഭരണനടപടികൾക്കും പിന്നാലെ ജൂൺ 15 മുതൽ പദ്ധതി യാഥാർഥ്യമായി. സംസ്ഥാനത്തെ ലക്ഷക്കണക്കിന് സ്ത്രീകൾക്ക് ഇതിന്റെ പ്രയോജനം ലഭിക്കാൻ തുടങ്ങി. പ്രിയദർശിനി എന്നാണ് പദ്ധതിയുടെ പേര്. ഈ ബോർഡ് എഴുതിയിട്ടുള്ള എല്ലാ ഓർഡിനറി ബസിലും സ്ത്രീകൾക്ക് സൗജന്യമായി യാത്ര ചെയ്യാവുന്നതാണ്. ഇതുമായി ബന്ധപ്പെട്ട് സന്തോഷ് പണ്ഡിറ്റ് പങ്കിട്ട രസകരമായൊരു കുറിപ്പ് ഇപ്പോൾ ശ്രദ്ധനേടുകയാണ്.
പ്രിയദർശിനി ബസിലെ കണ്ടക്ടർ ആകാൻ മോഹമുണ്ടെന്നാണ് സന്തോഷ് പണ്ഡിറ്റ് പറയുന്നത്. അങ്ങനെ ആയാൾ സ്ത്രീകൾക്ക് ഫ്രീ ടിക്കറ്റ് മാത്രമല്ല, മധുരമുള്ളൊരു കേക്കും സൗജന്യമായി നൽകുമെന്നും അതിലൂടെ കൂടുതൽ യാത്രക്കാരെ ബസിലേക്ക് കൊണ്ടുവരാൻ സാധിക്കുമെന്നും സന്തോഷ് പണ്ഡിറ്റ് പറയുന്നു. “കെഎസ്ആർടിസി “പ്രിയദർശിനി” ബസ്സിലെ കണ്ടക്ടർ ആകുവാൻ മോഹം..(വാൽ കഷ്ണം..ഞാൻ അങ്ങനെ കണ്ടക്ടർ ആയാൽ, ആ ബസ്സിൽ കയറുന്ന സ്ത്രീകൾക്ക് ഫ്രീ ടിക്കറ്റിനോടൊപ്പം മധുരമുള്ള കേക്കും സൗജന്യമായി നൽകും. അതിലൂടെ കൂടുതൽ സ്ത്രീ യാത്രക്കാരെ ഇത്തരം ബസ്സുകളിലേക്ക് ആകർഷിപ്പിക്കുവാൻ സാധിക്കും എന്നു കരുതാം..)”, എന്നായിരുന്നു സന്തോഷ് പണ്ഡിറ്റിന്റെ വാക്കുകൾ.
