ന്യൂഡല്ഹി: പഴങ്ങളും ഡ്രൈ ഫ്രൂട്ട്സും ഉള്പ്പെടുത്തുന്നതിന്റെ ഭാഗമായാണ് ഉച്ചഭക്ഷണത്തില് നിന്ന് മാംസാഹാരം ഒഴിവാക്കിയതെന്ന് ലക്ഷദ്വീപ് ഭരണകൂടം സുപ്രീംകോടതിയില് സത്യവാങ്മൂലം നല്കി. ലക്ഷദ്വീപില് മാംസാഹാരം വൃത്തിയായി സൂക്ഷിക്കാനും കൊണ്ടുപോകാനും ബുദ്ധിമുട്ടുണ്ടെന്നും സത്യവാങ്മൂലത്തില് വ്യക്തമാക്കുന്നു. ലക്ഷദ്വീപിലെ മിക്ക വീടുകളിലും മാംസാഹാരം ദൈനംദിന ആഹാരത്തിന്റെ ഭാഗമാണ്.
സ്കൂളിലെ മെനുവില് പഴങ്ങളും ഡ്രൈഫ്രൂട്ട്സും ഉള്പ്പെടുത്തി പരിഷ്കരിച്ചപ്പോള് മാംസാഹാരം ഒഴിവാക്കുകയായിരുന്നു. മാംസാഹാരം ഒഴിവാക്കാന് തീരുമാനിച്ച യോഗത്തില് വിവാദ അഡ്മിനിസ്ട്രേറ്റര് പ്രഫുല്ഖോഡ പട്ടേല് പങ്കെടുത്തില്ലെന്നും സത്യവാങ്മൂലത്തില് ചൂണ്ടിക്കാട്ടുന്നു. ഒരു കോടി രൂപയിലേറെ സാമ്പത്തികനഷ്ടം നേരിട്ടതിനെ തുടര്ന്നാണ് കവരത്തി, മിനിക്കോയ് ദ്വീപുകളിലെ ഡയറി ഫാമുകള് അടച്ചു പൂട്ടിയതെന്നും ഭരണകൂടം വിശദീകരിക്കുന്നു.
