കൊച്ചി : മുവാറ്റുപുഴ വാഴക്കുളത്ത് യുവാവ് സഞ്ചരിച്ച സ്കൂട്ടർ കെഎസ്ആർടിസി ബസുമായി കൂട്ടിയിടിച്ച് അപകടം. സംഭവത്തിൽ പാലക്കുഴ അമ്പലംകുന്ന് സ്വദേശി അഖിൽ (28) ന് ജീവൻ നഷ്ടമായി. മൂവാറ്റുപുഴ – പുനലൂർ സംസ്ഥാന പാതയിൽ വാഴക്കുളം പരീക്കപ്പീടികയ്ക്ക് സമീപം ഇന്നലെ പുലർച്ചെ ഒന്നോടെയാണ് അപകടം ഉണ്ടായത്. ബൈക്കിൽ അഖിലിനൊപ്പം സഞ്ചരിച്ചിരുന്ന ബന്ധുവായ രാജമ്മയ്ക്കും അപകടത്തിൽ പരിക്കേറ്റു. നാട്ടുകാർ ചേർന്ന് ഇരുവരെയും ആശുപത്രിയിലെത്തിച്ചെങ്കിലും അഖിലിന്റെ ജീവൻ രക്ഷിക്കാൻ കഴിഞ്ഞില്ല.
അരിക്കുഴ മൂഴിക്കൽ കാവിൽ നടന്ന ഉത്സവത്തിൽ പങ്കെടുത്ത് വാഴക്കുളത്തെ വീട്ടിലേക്ക് മടങ്ങുന്നതിനിടെയായിരുന്നു അപകടം.
ഇടിയുടെ ആഘാതത്തിൽ അഖിലിന്റെ വാരിയെല്ല് പൊട്ടുകയും ആന്തരിക രക്തസ്രാവം സംഭവിക്കുകയും ചെയ്തു. രാജമ്മയുടെ കൈക്കും കാലിനും പൊട്ടൽ ഏറ്റിട്ടുണ്ട്. അഖിലിന്റെ സംസ്കാരം വീട്ടു വളപ്പിൽ നടത്തി. സ്വകാര്യ സ്ഥാപനത്തിലെ ജീവനക്കാരനായിരുന്ന അഖിൽ അവിവാഹിതനാണ്.
