കൊല്ലം: കൊട്ടാരക്കരയില് റോഡില് സ്ഥാപിച്ചിരുന്ന കൂറ്റന് ദിശാ ഫലകത്തിന്റെ ലോഹപാളി വീണ് സ്കൂട്ടര് യാത്രക്കാരന്റെ കൈപ്പത്തി അറ്റു. കുടവട്ടൂര് അനന്തുവിഹാറില് മുരളീധരന്പിള്ള (57)യെ തിരുവനന്തപുരത്തെ സൂപ്പര് സ്പെഷ്യല്റ്റി ആശുപത്രിയില് പ്രവേശിപ്പിച്ചു. കൊട്ടാരക്കരയില് എംസി റോഡില് സ്ഥാപിച്ചിട്ടുള്ള ദിശാസൂചക ഫലകമാണ് യാത്രക്കാരന്റെ ദേഹത്തേക്ക് വീണത്. തുടര്ന്ന് സ്കൂട്ടര് നിയന്ത്രണം വിട്ടു മറിഞ്ഞു. അപകടത്തില് കൈപ്പത്തിക്കും വിരലുകള്ക്കും ഗുരുതരമായി പരിക്കേറ്റു. കഴിഞ്ഞ ദിവസം എംസി റോഡില് കൊട്ടാരക്കര കുന്നക്കരയിലാണ് സംഭവം.
കെഎസ്എഫ്ഇയുടെ കളക്ഷന് ഏജന്റായ മുരളീധരന്പിള്ള ജോലി കഴിഞ്ഞു മടങ്ങി വരുമ്പോള് കൂറ്റന് തൂണുകളില് സ്ഥാപിച്ചിരുന്ന ലോഹപാളി അടര്ന്നു ശരീരത്തില് വീഴുകയായിരുന്നു. മുറിവേറ്റു രക്തത്തില് കുളിച്ചുകിടന്ന മുരളീധരന്പിള്ളയെ ഓട്ടോറിക്ഷ ഡ്രൈവറാണ് താലൂക്ക് ആശുപത്രിയിലെത്തിച്ചത്. അവിടെ നിന്നു തിരുവനന്തപുരത്തെ ആശുപത്രിയിലേക്ക് മാറ്റി. സംഭവത്തില് മുരളീധരന്പിള്ള കൊട്ടാരക്കര പോലീസില് പരാതി നല്കിയിട്ടുണ്ട്.
