പാലക്കാട്: കൊട്ടേക്കാടിലെ സിപിഎം ലോക്കല് കമ്മിറ്റി അംഗം ഷാജഹാനെ കൊലപ്പെടുത്തിയ ശേഷം പ്രതികള് ബാറിലെത്തിയിരുന്നതിന്റെ ദൃശ്യങ്ങള് പുറത്ത്. ചന്ദ്രനഗറിലെ ബാറിലാണ് പ്രധാന പ്രതി നവീന് ഉള്പ്പെടെ മൂന്നുപേര് എത്തി മദ്യപിച്ച് മടങ്ങിയത്. അരമണിക്കൂറിലധികം നേരമാണ് ബാറില് ഇവര് ചെലവഴിച്ചതെന്നും ഷാജഹാന് കൊല്ലപ്പെട്ടെന്ന് ഉറപ്പിച്ചതിന് പിന്നാലെ നഗരം വിട്ടതായും തെളിഞ്ഞു.
രാത്രി ഒന്പതിനും ഒന്പതരയ്ക്കുമിടയിലായിരുന്നു ഷാജഹാന്റെ കൊലപാതകം. ഒന്പത് അന്പതോടെ പ്രതികളില് മൂന്നുപേര് ഒരു ഇരുചക്രവാഹനത്തിലായി ചന്ദ്രനഗറിലെ ബാറിലെത്തി. മദ്യം ഓര്ഡര് ചെയ്തും കൗണ്ടറിലിരുന്ന യുവാവിനോട് സംസാരിച്ചും പത്ത് മിനിറ്റ് നേരം ചെലവഴിച്ചു. മറ്റുള്ളവര്ക്കൊപ്പം മൂവരും കസേരയില് ഇരുന്ന് മദ്യപിച്ചില്ല. പകരം ശുചിമുറിയിലേക്കുള്ള ഭാഗത്ത് നിന്ന് മൂന്നുപേരും മദ്യപിച്ചു. പിന്നാലെ ആഹാരം പാഴ്സലായി വാങ്ങി അര മണിക്കൂറിന് ശേഷം വന്ന വാഹനത്തില് മടങ്ങുകയായിരുന്നു.
നവീന് പിടിയിലായതിന് പിന്നാലെയാണ് ബാറിലെത്തിയിരുന്ന വിവരം പോലീസിനോട് പറഞ്ഞത്. അന്വേഷണസംഘം ബാറിലെത്തി ദൃശ്യങ്ങള് ശേഖരിച്ച് ജീവനക്കാരുടെ മൊഴിയെടുത്തു. ബാറില് നിന്നിറങ്ങിയ ശേഷം മൂവരും വീണ്ടും മദ്യപിച്ച് ഭക്ഷണം കഴിച്ച് വ്യത്യസ്ത സ്ഥലങ്ങളിലേക്ക് രക്ഷപ്പെട്ടുവെന്നാണ് മൊഴി. ബാറിലേക്കുള്ള യാത്രയിലും മടങ്ങുമ്പോഴും നവീന് ഷാജഹാനെ വെട്ടിയ ശേഷമുണ്ടായ കാര്യങ്ങളെക്കുറിച്ച് പലരോടും ഫോണില് വിളിച്ച് അന്വേഷിച്ചിരുന്നതായും പോലീസ് സ്ഥിരീകരിച്ചിട്ടുണ്ട്.
