റഷ്യ: സെന്ട്രല് റഷ്യയിലെ സ്കൂളില് അഞ്ജാതന് നടത്തിയ വെടിവെപ്പില് ഏഴ് കുട്ടികളടക്കം പതിമൂന്ന് പേര് കൊല്ലപ്പെട്ടു.
തലസ്ഥാനമായ ഇഷെവ്സ്കിലെ സ്കൂളില് തിങ്കളാഴ്ച രാവിലെയാണ് സംഭവം. വെടിവെയ്പില് 21 പേര്ക്ക് പരിക്കേറ്റെന്നും ലോക്കല് പോലീസ് അറിയിച്ചു. ഒന്നു മുതല് 11 വരെ ഗ്രേഡിലുള്ള വിദ്യാര്ത്ഥികളാണ് ഈ സ്കൂളില് പഠിക്കുന്നത്. വെടിയുതിര്ത്ത ശേഷം അക്രമി സ്വയം വെടി വെച്ചു മരിച്ചതായും പോലീസ് അറിയിച്ചു.
കയ്യില് തോക്കുമായി വന്ന അജ്ഞാതന് ഒരു സെക്യൂരിറ്റി ജീവനക്കാരനെയും അവിടെയുള്ള ചില കുട്ടികളെയും കൊന്നതായി ഉദ്മൂര്ത്തിയ മേഖലയുടെ ഗവര്ണര് അലക്സാണ്ടര് ബ്രെച്ചലോവ് വീഡിയോ പ്രസ്താവനയില് അറിയിച്ചു. സ്കൂള് ഒഴിപ്പിച്ചതായും പരിസരം വേലി കെട്ടിയതായും അധികൃതര് വ്യക്തമാക്കി. അക്രമിയെക്കുറിച്ചോ ഇയാളുടെ ഉദ്ദേശ്യത്തെക്കുറിച്ചോ ഇതുവരെ വിവരങ്ങളൊന്നും പുറത്തുവിട്ടിട്ടില്ല.
