കോന്നി : പുനലൂർ മൂവാറ്റുപുഴ സംസ്ഥാന പാതയിൽ കോന്നി മാമൂട്ടിൽ ഇലക്ട്രിക് പോസ്റ്റ് നീക്കം ചെയ്യാതെ നടപ്പാതയിൽ ഇന്റർലോക്ക് കട്ടകൾ പാകി അധികൃതർ. റോഡ് ടാറിങ് നടത്തിയിരിക്കുന്ന ഇവിടെ ഒരാൾക്ക് കഷ്ടിച്ച് നടന്നുപോകാവുന്ന സ്ഥലം മാത്രമാണ് നടപാതയിൽ ഉള്ളത്. നടപ്പാതയിൽ സ്ഥാപിച്ചിരിക്കുന്ന ഇലക്ട്രിക് പോസ്റ്റ് മാറ്റി സ്ഥാപിച്ച ശേഷം ഇന്റർലോക്ക് കട്ടകൾ പാകി നടപ്പാത നിർമ്മിക്കേണ്ട ഇവിടെ ഇത് മാറ്റാതെ ആണ് നിർമ്മിച്ചിരിക്കുന്നത്.
നടപ്പാതയുടെ അരികിൽ വേലിയും സ്ഥാപിച്ചിട്ടുണ്ട്. റോഡ് നിർമ്മാണവുമായി ബന്ധപ്പെട്ട് പൊതു ജനങ്ങളിൽ നിന്നും നിരവധി പരാതികൾ ഉയർന്നതിനെ തുടർന്ന് കഴിഞ്ഞ ദിവസം കോന്നി എം എൽ എ യുടെ നേതൃത്വത്തിൽ സ്ഥലം പരിശോധിച്ചിരുന്നു. പല സ്ഥലങ്ങളിലും ഓട നിർമ്മാണം പാതി വഴിയിൽ മുടങ്ങുന്നതും പ്രതിസന്ധി സൃഷ്ടിക്കുന്നുണ്ട്.
