തിരുവനന്തപുരം : കേരളത്തില് സിക്ക വൈറസ് ബാധ. തിരുവനന്തപുരം കോര്പ്പറേഷന് പരിധിയിലെ പത്തിലധികം പേര്ക്കാണ് വൈറസ് ബാധ സ്ഥിരീകരിച്ചത്. സംസ്ഥാനത്ത് ഇതാദ്യമായാണ് സിക്ക വൈറസ് ബാധ സ്ഥിരീകരിക്കുന്നത്. പൂനെ വൈറോളജി ഇന്സ്റ്റിറ്റ്യൂട്ടില് നടത്തിയ സാമ്പിള് പരിശോധനയിലാണ് വൈറസ് ബാധ സ്ഥിരീകരിച്ചത്.
കൊതുകുകള് വഴി പടരുന്ന രോഗമാണ് സിക്ക. ഡെങ്കിപ്പനിക്കും ചിക്കുന്ഗുനിയക്കും സമാനമായ രോഗലക്ഷണം തന്നെയാണ് സിക്ക വൈറസ് ബാധയ്ക്കും. പകല് കടിക്കുന്ന ഈഡിസ് വിഭാഗത്തില്പ്പെട്ട കൊതുകാണ് വൈറസ് പരത്തുന്നത്. സിക്ക വൈറസ് ബാധയ്ക്ക് പ്രത്യേകിച്ച് ചികിത്സ ലഭ്യമല്ല. ലക്ഷണങ്ങള്ക്ക് അനുസരിച്ചുള്ള ചികിത്സയാണ് രോഗികള്ക്ക് നല്കുക.
സിക്ക വൈറസ് ഗുരുതരമായ പ്രശ്നങ്ങള് സൃഷ്ടിക്കാറില്ല. വിശ്രമിച്ചാല് പൂര്ണമായും മാറും. എന്നാല് ഗര്ഭിണികളെയാണ് ബാധിക്കുന്നതെങ്കില് ഗര്ഭസ്ഥശിശുക്കളുടെ തലയോട്ടിക്ക് വളര്ച്ചക്കുറവ് ഉള്പ്പെടെ ആരോഗ്യപ്രശ്നങ്ങള് സംഭവിച്ചേക്കാം. അതിനാല് ഗര്ഭിണികള് അതീവജാഗ്രത പുലര്ത്തണം. രക്തം സ്വീകരിക്കുന്നതിലൂടെയും ലൈംഗിക ബന്ധത്തിലുടെയും രോഗം പകരുമെന്നതും ഗൗരവമായി കാണണം.
