പത്തനംതിട്ട : കലഞ്ഞൂർ പഞ്ചായത്തിലെ ആദ്യത്തെ സ്മാർട്ട് അംഗൻവാടിക്ക് ഇന്ന് ശിലാസ്ഥാപനം നടത്തി. കലഞ്ഞൂർ പഞ്ചായത്ത് പതിനഞ്ചാം വാർഡിലെ 64 ആം നമ്പർ അംഗൻവാടിയാണ് സ്മാർട്ട് ആകുന്നത്. ഇരുപത്തി ഏഴു ലക്ഷത്തി അറുപത്തി അയ്യായിരം രൂപയാണ് ഇതിന് വേണ്ടി അനുവദിച്ചിരിക്കുന്ന തുക. വാർഡ് മെമ്പർ പി.എസ് അരുണിന്റെ അധ്യക്ഷതയിൽ പറക്കോട് ബ്ലോക്ക് പഞ്ചായത്ത് പ്രസിഡന്റ് തുളസിധരൻ പിള്ള ശിലാസ്ഥാപനം നടത്തി. കലഞ്ഞൂർ ഗ്രാമ പഞ്ചായത്ത് പ്രസിഡന്റ് പുഷ്പവല്ലി ടീച്ചർ മുഖ്യപ്രഭാഷണം നടത്തി.
ചടങ്ങിൽ പറക്കോട് ബ്ലോക്ക് വൈസ് പ്രസിഡന്റ് എം.പി മണിയമ്മ, കലഞ്ഞൂർ ഗ്രാമ പഞ്ചായത്ത് വൈസ് പ്രസിഡന്റ് മിനി എബ്രഹാം, ക്ഷേമകാര്യ സ്റ്റാൻഡിങ് കമ്മിറ്റി ചെയർമാൻ ഷാൻ ഹുസൈൻ, ശിശു വികസന പദ്ധതി ഓഫീസർ റാണി, മറ്റ് വാർഡ് മെമ്പറുമാരും പങ്കെടുത്തു. പദ്ധതി വാർഡിൽ എത്തിക്കുന്നതിന് വേണ്ട പ്രവൃത്തനങ്ങൾക്ക് എല്ലാവിധ സഹകരണവും നൽകിയ കലഞ്ഞൂർ ഗ്രാമപഞ്ചായത്ത് ഭരണസമിതി, പറക്കോട് ബ്ലോക്ക് പഞ്ചായത്ത് ഭരണ സമിതി, ഐ സി ഡി എസ് ഉദ്യോഗസ്ഥർ എന്നിവർക്ക് പ്രത്യേകം നന്ദി വാർഡിന്റെ ജനപ്രതിനിധി പി.എസ് അരുൺ അറിയിച്ചു.
