മലപ്പുറം: സോണിയാ ഗാന്ധിയെ ഇഡി ചോദ്യം ചെയ്യുന്നതിനെതിരെ മലപ്പുറത്ത് ട്രെയിന് തടഞ്ഞ് പ്രതിഷേധം. അങ്ങാടിപ്പുറം റെയിവേ സ്റ്റേഷനിൽ യൂത്ത് കോൺഗ്രസ് പ്രവർത്തകരാണ് ട്രെയിൻ തടഞ്ഞത്. നിലമ്പൂർ – ഷൊർണൂർ ട്രെയിനാണ് തടഞ്ഞത്. സമരത്തെ തുടർന്ന് 15 മിനിട്ട് ട്രെയിൻ അങ്ങാടിപ്പുറത്ത് നിറുത്തിയിട്ടു. രാജ്യവ്യാപകമായ പ്രതിഷേധത്തിന്റെ ഭാഗമായാണ് കേരളത്തിലും യൂത്ത് കോൺഗ്രസിന്റെ പ്രതിഷേധം. ട്രെയിനിൽ മുകളിൽ കയറി നിന്നാണ് പ്രവർത്തകർ പ്രതിഷേധിച്ചത്.
സോണിയ ഗാന്ധി ഇന്ന് വീണ്ടും എന്ഫോഴ്സ്മെന്റ് ഡയറക്ടറേറ്റിന് മുന്നിൽ ഹാജരായി. ജൂലൈ 21ന് കോൺഗ്രസ് അധ്യക്ഷയെ ഇഡി ആദ്യ ഘട്ടമായി ചോദ്യം ചെയ്തിരുന്നു. എന്നാൽ സുഖമില്ലെന്ന് ചൂണ്ടിക്കാട്ടി ചോദ്യം ചെയ്യൽ പൂർത്തിയാക്കാൻ അന്ന് സാധിച്ചിരുന്നില്ല. ഇതിന്റെ ഭാഗമായാണ് ജൂലൈ 26 ന് ഹാജരാകാൻ ഇഡി നിർദേശം നല്കിയത്.
