തിരുവനന്തപുരം: സംസ്ഥാനത്ത് വാഹനങ്ങളുടെ വേഗപരിധി പുതുക്കി. എ.ഐ കാമറകള് പ്രവര്ത്തന സജ്ജമായതിനെത്തുടര്ന്നാണ് വേഗപരിധി പുനര്നിശ്ചയിക്കാന് തീരുമാനിച്ചത്. ഇരുചക്ര വാഹനങ്ങളുടെ വേഗപരിധി കുറക്കാന് തീരുമാനിച്ചതാണ് പ്രധാന മാറ്റം. പുതുക്കിയ വേഗപരിധിയും നിലവിലുള്ള വേഗപരിധി ബ്രാക്കറ്റിലും: ആറുവരി ദേശീയ പാതയില് 110 കിലോമീറ്റര്, നാലുവരി ദേശീയ പാതയില് 100 (90), മറ്റ് ദേശീയപാത, എം.സി റോഡ്, നാലുവരി സംസ്ഥാന പാത എന്നിവയില് 90 (85), മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 80 (80), മറ്റു റോഡുകളില് 70 (70), നഗര റോഡുകളില് 50 (50) എന്നിങ്ങനെയാണ് ഒമ്പത് സീറ്റ് വരെയുള്ള വാഹനങ്ങളുടെ അനുവദിനീയ വേഗപരിധി.
ഒമ്പത് സീറ്റിന് മുകളിലുള്ള ലൈറ്റ്-മീഡിയം ഹെവി മോട്ടോര് യാത്ര വാഹനങ്ങള്ക്ക് ആറുവരി ദേശീയ പാതയില് 95 കിലോമീറ്റര്, നാലുവരി ദേശീയ പാതയില് 90 (70), മറ്റ് ദേശീയപാത, എം.സി റോഡ്, നാലു വരി സംസ്ഥാന പാത എന്നിവയില് 85 (65), മറ്റു സംസ്ഥാനപാതകളിലും പ്രധാന ജില്ലാ റോഡുകളിലും 80 (65), മറ്റു റോഡുകളില് 70 (60), നഗര റോഡുകളില് 50 (50) എന്നിങ്ങനെയാണ് അനുവദനീയ വേഗപരിധി. ലൈറ്റ് മീഡിയം ഹെവി വിഭാഗത്തില്പ്പെട്ട ചരക്ക് വാഹനങ്ങള്ക്ക് ആറുവരി, നാലുവരി ദേശീയപാതകളില് 80 (70) കിലോമീറ്ററും മറ്റ് ദേശീയപാതകളിലും നാലുവരി സംസ്ഥാന പാതകളിലും 70 (65) മറ്റ് സംസ്ഥാനപാതകളിലും പ്രധാന ജില്ലാ റോഡുകളിലും 65 (60) മറ്റ് റോഡുകളില് 60 (60) നഗര റോഡുകളില് 50 (50) എന്നിങ്ങനെ നിജപ്പെടുത്തും. സംസ്ഥാനത്ത് റോഡപകടങ്ങളില് ഗണ്യഭാഗവും ഇരുചക്ര വാഹനങ്ങളായതിനാല് അവയുടെ പരമാവധി വേഗപരിധി 70 കിലോമീറ്ററില്നിന്ന് 60 ആയി കുറക്കും. മുച്ചക്ര വാഹനങ്ങളുടെയും സ്കൂള് ബസുകളുടെയും പരമാവധി വേഗപരിധി നിലവിലുള്ള 50 കിലോമീറ്ററായി തുടരും.
