പത്തനംതിട്ട : എസ്.എസ്.എല്.സി പരീക്ഷ ഫലത്തില് 99.72% വിജയത്തോടെ പത്തനംതിട്ട റവന്യു ജില്ല സംസ്ഥാനത്ത് ഒന്നാം സ്ഥാനത്ത് എത്തി. വിദ്യാഭ്യാസ ജില്ലയില് കുട്ടനാടാണ് ഒന്നാം സ്ഥാനത്ത്. തിരുവനന്തപുരം ജില്ലയാണ് ഏറ്റവും കുറഞ്ഞ വിജയ ശതമാനം നേടിയത്. പത്തനംതിട്ട ജില്ലയിലെ മലയോര മേഖലയിലെ സ്കൂളുകള് ഈ തവണ മികച്ച നിലവാരം പുലര്ത്തി. റാന്നി, കോന്നി അടക്കമുള്ള മലയോര മേഖലയിലെ സ്കൂളുകള് പലതും നൂറു ശതമാനം വിജയം കരസ്ഥമാക്കി. കോന്നി ഗവണ്മെന്റ് ഹയര് സെക്കണ്ടറി സ്കൂള് ഈ എസ്.എസ്.എല്.സി പരീക്ഷ ഫലം പുറത്ത് വന്നപ്പോള് 99% വിജയം നേടി. 215 കുട്ടികള് പരീക്ഷ എഴുതിയതില് 20 പേര് മുഴുവന് വിഷയങ്ങള്ക്കും എ.പ്ലസ് കരസ്ഥമാക്കി.
തേക്കുതോട് ഗവണ്മെന്റ് ഹയര് സെക്കണ്ടറി സ്കൂള് നൂറു ശതമാനം വിജയം നേടി. പതിനാറ് കുട്ടികള് പരീക്ഷ എഴുതിയതില് ഒരാള് എല്ലാ വിഷയങ്ങള്ക്കും എ.പ്ലസ് നേടി. കോന്നി ആര്.വി.എച്ച്.എസ് സ്കൂളും ഈ വര്ഷം നൂറുശതമാനം വിജയം നേടി. 190 കുട്ടികള് പരീക്ഷ എഴുതിയതില് പതിനെട്ട് കുട്ടികള് എല്ലാ വിഷയങ്ങള്ക്കും എ.പ്ലസ് നേടി. കലഞ്ഞൂര് ഗവണ്മെന്റ് ഹയര് സെക്കണ്ടറി സ്കൂളില് ഇരുപത് വിദ്യാര്ഥികള് പരീക്ഷ എഴുതിയതില് മുഴുവന് പേരും വിജയിക്കുകയും ഒരാള് മുഴുവന് വിഷയങ്ങള്ക്കും എ.പ്ലസ് നേടുകയും ചെയ്തു.
ചിറ്റാര് ജി.എച്ച്.എസ് ല് 112 പേര് പരീക്ഷ എഴുതിയതില് മുഴുവന് പേരും വിജയിക്കുകയും ഒന്പത് വിദ്യാര്ഥികള് എ.പ്ലസ് നേടുകയും ചെയ്തു. സീതത്തോട് കെ.ആര്.പി.എം സ്കൂള് നൂറു ശതമാനം വിജയം നേടി. 102 പേര് പരീക്ഷയെഴുതിയതില് മൂന്നുപേര് എല്ലാ വിഷയങ്ങള്ക്കും എ.പ്ലസ് നേടി. കട്ടച്ചിറ ട്രൈബല് സ്കൂളില് 5 വിദ്യാര്ഥികള് പരീക്ഷ എഴുതിയതില് രണ്ടുപേര് മുഴുവന് വിഷയങ്ങള്ക്കും എ.പ്ലസ് നേടി. വയ്യാറ്റുപുഴ വി.കെ.എന്.എം സ്കൂളില് 18 വിദ്യാര്ഥികള് പരീക്ഷ എഴുതിയതില് മുഴുവന് പേരും വിജയിച്ചു. പത്തനംതിട്ട ജില്ലയിലെ ആറന്മുള, കോന്നി, റാന്നി, അടൂര്, തിരുവല്ല വിദ്യാഭ്യാസ ഉപജില്ലകളിലെ സ്കൂളുകളില് പലതും നൂറു ശതമാനം വിജയം നേടി.
