അടൂര് : അടൂര് കരുവാറ്റ ജംഗ്ഷനില് തെരുവ് നായയുടെ ആക്രമണത്തില് ഒരു കുടുംബത്തിലെ മൂന്നുപേര്ക്ക് പരിക്ക്. പതിമൂന്ന് വയസുള്ള പെണ്കുട്ടിക്കും അമ്മയ്ക്കും സഹോദരനുമാണ് പരിക്കേറ്റത്. ഇരുചക്ര വാഹനത്തിന് നേരെ തെരുവ് നായ ഓടിയെത്തുകയും വാഹനത്തിന് കുറുകെ ചാടുകയുമായിരുന്നു. വാഹനത്തില് നിന്നും റോഡിലേക്ക് തെറിച്ച് വീണ ഇവരെ തെരുവ് നായ ആക്രമിക്കുകയായിരുന്നു. മൂന്നുപേര്ക്കും നായയുടെ കടിയേറ്റിട്ടുണ്ട്. കുട്ടികളെ നായ ആക്രമിക്കുന്നത് കണ്ട് രക്ഷിക്കാന് ശ്രമിക്കുന്നതിനിടെയാണ് അമ്മയെയും നായ ആക്രമിച്ചത്.
പെണ്കുട്ടിയുടെ കൈക്കും കാലിനും സഹോദരന്റെ കാലിനും പരിക്കേറ്റിട്ടുണ്ട്. അമ്മയുടെ കയ്യിലാണ് പരിക്കേറ്റത്. ഇവരെ മൂന്നു പേരെയും ആശുപത്രിയില് പ്രവേശിപ്പിച്ചു. അടൂരിലും പരിസരങ്ങളിലും തെരുവ് നായ ശല്യം രൂക്ഷമാണെന്ന് കാലങ്ങളായി പരാതി ഉയര്ന്നിട്ടും യാതൊരു നടപടിയും അധികൃതര് സ്വീകരിക്കുന്നില്ല. അടുത്തിടെയാണ് അടൂര് നഗരത്തില് നായകള്ക്ക് അനധികൃതമായി തീറ്റ നല്കിയ സ്ത്രീയെ നാട്ടുകാര് പിടികൂടി പോലീസിന് കൈമാറിയത്.
