റാന്നി : ആഘോഷങ്ങളെക്കാൾ വലുതാണ് സഹജീവികളോടുള്ള കരുതല് എന്ന് തെളിയിച്ചിരിക്കുകയാണ് റാന്നി പാലച്ചുവട് എസ്.എൻ.റ്റി യു.പി സ്കൂൾ അധികൃതരും വിദ്യാര്ഥികളും. വർഷങ്ങളായി സ്കൂളിൽ നടത്തി വന്നിരുന്ന ഓണാഘോഷം ഇത്തവണ ഒഴിവാക്കി ആഘോഷത്തിനായി നീക്കിവെച്ച പണം വെള്ളപ്പൊക്കത്തിൽ കടുത്ത ദുരിതമനുഭവിച്ച രണ്ട് കുടുംബങ്ങൾക്ക് കൈമാറിയാണ് സ്കൂൾ മാതൃകയായത്. അപ്രതീക്ഷിതമായെത്തിയ വെള്ളപ്പൊക്കത്തിൽ റാന്നി മേഖലയിൽ വൻ നാശനഷ്ടങ്ങളാണ് സംഭവിച്ചത്.
പി.റ്റി.എ യും വിദ്യാർത്ഥികളും ചേർന്ന് ശേഖരിച്ച തുക ഉപയോഗിച്ചാണ് എല്ലാ വർഷവും സ്കൂളിൽ വിപുലമായി ഓണം ആഘോഷിക്കാറുള്ളത്. എന്നാൽ ഇത്തവണ ചുറ്റുമുള്ളവരുടെ ദുരിതം കണ്ടപ്പോൾ ആഘോഷങ്ങൾ മാറ്റിവെച്ച് ആ തുക ഏറ്റവും കൂടുതൽ ദുരിതമനുഭവിച്ച കുടുംബങ്ങൾക്ക് നൽകാൻ സ്കൂൾ അധികൃതരും വിദ്യാർത്ഥികളും അധ്യാപകരും പി.റ്റി.എ യും ഒറ്റക്കെട്ടായി തീരുമാനിക്കുകയും ചെയ്തു. ഇതിനെ തുടര്ന്ന് ദുരിതാശ്വാസ നിധിയിലേക്കുള്ള തുക അർഹരായ രണ്ട് കുടുംബങ്ങൾക്ക് കൈമാറി. നാടിനാകെ മാതൃകയായ സ്കൂളിന്റെ ഈ കാരുണ്യ പ്രവൃത്തിയെ നാട്ടുകാരും ജനപ്രതിനിധികളും അഭിനന്ദിക്കുകയും ചെയ്തു.
