കോന്നി : കോന്നി മാങ്കുളത്ത് തെരുവ് നായകള് വീടുകളുടെ മുറ്റത്ത് കയറി നാശം വരുത്തുകയും സാധനങ്ങള് കടിച്ചെടുത്ത് കൊണ്ടുപോവുകയും ചെയ്യുന്നത് പതിവാകുന്നു. കോന്നി ടൌണിനോട് ചേര്ന്ന് കിടക്കുന്ന പ്രദേശമാണ് മാങ്കുളം. ഈ ഭാഗത്തെ വീടുകളുടെ പരിസരങ്ങളില് തെരുവ് നായകള് കൂട്ടത്തോടെയാണ് പലപ്പോഴും എത്തുന്നത്. ഗേറ്റിന്റെ അഴികള്ക്ക് ഇടയിലൂടെ വീട്ടുമുറ്റത്ത് കടക്കുന്ന നായകള് ചെരുപ്പും വസ്ത്രങ്ങളും മുറ്റത്ത് സൂക്ഷിച്ചിരിക്കുന്ന സാധനങ്ങളും ഉള്പ്പടെ കടിച്ചുകൊണ്ട് പോകുകയാണ്. കൂടാതെ വസ്ത്രങ്ങളും മറ്റും കടിച്ച് കീറി ഇടുകയും ചെയ്യും. കഴിഞ്ഞ ദിവസം മാങ്കുളത്തെ ഒരു വീട്ടില് നായ കടക്കാതിരിക്കാന് ഗേറ്റിനോട് ചേര്ന്ന് സ്ഥാപിച്ചിരുന്ന വലയും നായകള് കടിച്ച് നശിപ്പിച്ചിരുന്നു.
കോന്നി നഗരത്തില് അലയുന്ന നായകളാണ് ഈ പ്രദേശത്തേക്ക് എത്തുന്നതെന്നാണ് പ്രദേശവാസികള് പറയുന്നത്. നായകളെ ഭയന്ന് മാങ്കുളം നിവാസികള് കൊച്ചുകുട്ടികളെ പോലും പകല് സമയം രക്ഷിതാക്കള് കൂടെ ഇല്ലാതെ വീടിന് വെളിയില് വിടാന് ഭയപ്പെടുകയാണ്. കോന്നി ചന്തയും കെ.എസ്.ആര്.റ്റി.സി സ്റ്റാന്റ് പരിസരവും ഉള്പ്പെടെ തെരുവ് നായകളുടെ വിഹാര കേന്ദ്രമായി മാറുകയാണ്. നഗരത്തില് വലിച്ചെറിയുന്ന മാലിന്യങ്ങളും നായകളുടെ ശല്യം വര്ധിപ്പിക്കുന്നു. നായകള് നഗരത്തില് വാഹനങ്ങളുടെ പുറകെ ഓടുന്നതും പതിവാണ്.
