കുന്നംകുളം : കീഴൂര് പോളിടെക്നിക് കോളേജിലെ എസ്.എഫ്.ഐ വിദ്യാര്ത്ഥികളും വിവേകാനന്ദ കോളേജിലെ എ.ബി.വി.പി വിദ്യാര്ത്ഥികളും തമ്മില് സംഘര്ഷം. സംഘര്ഷത്തില് കീഴൂര് പോളിടെക്നിക് കോളേജിലെ ടി.ഡി മൂന്നാം വര്ഷ വിദ്യാര്ത്ഥി കേച്ചേരി പെരുമണ്ണൂര് പന്തീരായില് വീട്ടില് സന്തോഷിന് (21) തലയ്ക്ക് പരിക്കേറ്റു. കുന്നംകുളം ബസ് സ്റ്റാന്ഡില് വെച്ച് ബസില് കയറുന്നത് സംബന്ധിച്ച തര്ക്കമാണ് സംഘര്ഷത്തില് കലാശിച്ചതെന്ന് വിദ്യാര്ത്ഥികള് പറയുന്നു.
സ്റ്റാന്ഡില് നിന്നും പുറപ്പെട്ട ബസില് ആദ്യം കയറിയ പോളിടെക്നിക് കോളജിലെ വിദ്യാര്ത്ഥികളെ വിവേകാനന്ദ കേളേജിലെ എ.ബി.വി.പി വിദ്യാര്ത്ഥികള് വലിച്ച് താഴെയിറക്കിയതാണ് പ്രശ്നങ്ങള്ക്ക് തുടക്കം. ഇത് ചോദ്യം ചെയ്ത് വിവേകാനന്ദ കോളേജില് നിന്നും ബൈക്കിലെത്തിയ നാല് വിദ്യാര്ത്ഥികള് ബിയര് ബോട്ടില് കൊണ്ട് സന്തോഷിന്റെ തലയ്ക്ക് അടിക്കുകയായിരുന്നു. പരിക്കേറ്റ വിദ്യാര്ത്ഥിയെ കുന്നംകുളം മലങ്കര ആശുപത്രിയില് പ്രവേശിപ്പിച്ചു.
