കൈപ്പട്ടൂർ: സാമൂഹിക പുരോഗതിക്കായി ലിംഗസമത്വവും നാടിന്റെ ഭാവിക്കായി ലഹരിവിരുദ്ധ പോരാട്ടവും വിദ്യാർഥി സമൂഹം ഏറ്റെടുക്കണമെന്ന് ജില്ലാ പഞ്ചായത്ത് അംഗം റോബിൻ പീറ്റർ പറഞ്ഞു. കൈപ്പട്ടൂർ ഗവ. വി.എച്ച്.എസ്.എസ്സിൽ എൻ.എസ്.എസ്. യൂണിറ്റിന്റെ ആഭിമുഖ്യത്തിൽ ആരംഭിച്ച രണ്ട് ദിവസത്തെ സഹവാസ ക്യാമ്പ് ‘നിറവ്’ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ക്യാമ്പിന്റെ പ്രധാന സന്ദേശം ഉയർത്തിപ്പിടിച്ചുകൊണ്ട് ലിംഗസമത്വ കാമ്പയിന്റെ ഭാഗമായി ‘സമത്വ ജ്വാല’ റോബിൻ പീറ്റർ തെളിയിച്ചു. വിദ്യാർഥികൾ കൈകളിലേന്തിയ മെഴുകുതിരികൾ ഒരുമിച്ച് കത്തിച്ച ചടങ്ങ് ശ്രദ്ധേയമായി.
സ്കൂൾ പ്രിൻസിപ്പൽ സജിത ബീവി എം അധ്യക്ഷത വഹിച്ചു. എൻ.എസ്.എസ്. യൂണിറ്റ് പ്രോഗ്രാം ഓഫീസർ ഷാജി ജോർജ് പി. ക്യാമ്പ് പ്രവർത്തനങ്ങൾക്ക് നേത്രുത്വം നല്കി. പി.ടി.എ. പ്രസിഡന്റ് പ്രകാശ് ജി.പി., എൻ.എസ്.എസ്. ക്ലസ്റ്റർ കോർഡിനേറ്റർ ലത പി ചന്ദ്രൻ, അധ്യാപകർ തുടങ്ങിയവർ ചടങ്ങിൽ ആശംസകൾ നേർന്നു. രണ്ട് ദിവസത്തെ നിറവ്’ ക്യാമ്പിൽ ലിംഗസമത്വവും ലഹരിയുടെ ദൂഷ്യഫലങ്ങളെക്കുറിച്ചുള്ള ബോധവൽക്കരണവും മുഖ്യവിഷയങ്ങളാക്കിയുള്ള ക്ലാസ്സുകൾ, ചർച്ചകൾ, സാമൂഹിക സർവ്വേ, ശുചീകരണ പ്രവർത്തനങ്ങൾ എന്നിവ നടക്കും.
