ഡെറാഡൂണ് : സ്കൂളില് അകാരണമായി നിലവിളിച്ച് കരഞ്ഞ് വിദ്യാര്ത്ഥിനികള്. ഉത്തരാഖണ്ഡിലെ ബാഗേശ്വര് ജില്ലയിലെ സര്ക്കാര് സ്കൂളിലാണ് സംഭവം. വിദ്യാര്ത്ഥിനികള് കൂട്ടത്തോടെ നിലവിളിച്ച് അസ്വഭാവികമായി പെരുമാറുകയായിരുന്നു. ഇന്നലെ രാവിലെ വിദ്യാര്ത്ഥികള് കൂട്ടമായി കരയുന്നതിന്റെയും നിലവിളിക്കുന്നതിന്റെയും ദൃശ്യങ്ങള് പുറത്ത് വന്നു. വീഡിയോയില് ചില പെണ്കുട്ടികള് കരഞ്ഞ് തളര്ന്ന് അബോധാവസ്ഥയില് കിടക്കുന്നതും ചിലര് ഉച്ചത്തില് നിലവിളിക്കുന്നതും കാണാം.
അദ്ധ്യാപകര് ആശ്വസിപ്പിക്കാന് ശ്രമിക്കുന്നുണ്ടെങ്കിലും കുട്ടികള് ഉച്ചത്തില് കരച്ചില് തുടരുകയായിരുന്നു. കുട്ടികളെ രക്ഷിതാക്കളുടെ ഒപ്പം പറഞ്ഞയച്ചാണ് സ്കൂള് അധികൃതര് താല്ക്കാലം പ്രശ്നം പരിഹരിച്ചത്. സംഭവത്തെ കുറിച്ച് അന്വേഷിക്കാന് സര്ക്കാര് ഉത്തരവിട്ടു. ഡോക്ടര്മാരുടെ വിദഗ്ധ സംഘം സ്കൂളിലെത്തും.
