കൊച്ചി : ആത്മഹത്യ നിരക്കില് കേരളം രാജ്യത്ത് അഞ്ചാം സ്ഥാനത്ത്. കഴിഞ്ഞ വര്ഷം ഒമ്പതിനായിരത്തോളം പേരാണ് ആത്മഹത്യ ചെയ്തതെന്നാണ് ക്രൈം റിക്കാര്ഡ്സ് ബ്യൂറോയുടെ കണക്ക്. ഓരോ വര്ഷവും ആത്മഹത്യയുടെ നിരക്ക് കൂടിവരികയാണ്. കുടുംബ പ്രശ്നങ്ങളെത്തുടര്ന്നാണ് കൂടുതല് ആത്മഹത്യകളും. പ്രേമനൈരാശ്യം, കടബാധ്യത, അസുഖങ്ങള്, ജോലിയില്ലാത്തത് തുടങ്ങിയവയാണ് ആത്മഹത്യയുടെ മറ്റു പ്രധാന കാരണങ്ങളായി കണ്ടെത്തിയത്. ആത്മഹത്യ ചെയ്യുന്നവരില് കൂടുതലും പുരുഷന്മാരാണ്.
ക്രൈം റിക്കാര്ഡ്സ് ബ്യൂറോയുടെ കണക്കില് കഴിഞ്ഞ വര്ഷം ആത്മഹത്യ ചെയ്തവരില് 6570 പേര് പുരുഷന്മാരാണ്. സ്ത്രീകള് 1950 പേര്. ആത്മഹത്യ ചെയ്യുന്നവരുടെ വിദ്യാഭ്യാസം പരിശോധിച്ചാല് 34 പേര് പ്രഫഷണല് ഡിഗ്രിയുള്ളവരാണ്. 262 പേര് ഡിഗ്രിയും അതിനു മുകളിലും വിദ്യാഭ്യാസം നേടിയവര്. പത്താം ക്ലാസ്വരെ പഠിച്ചവരാണ് ആത്മഹത്യ ചെയ്തവരില് കൂടുതലെന്നാണ് പോലീസിന്റെ കണക്കില് വ്യക്തമാകുന്നത്. സര്ക്കാര് ജീവനക്കാരായ 70 പേരും സ്വകാര്യ സ്ഥാപനങ്ങളില് ജോലി ചെയ്തിരുന്ന 593 പേരും ജീവനൊടുക്കിയവരിലുണ്ട്.
