തിരുവനന്തപുരം : തിരുവല്ലം പോലീസിന്റെ കസ്റ്റഡിയിലിരിക്കെ സുരേഷ് എന്ന പ്രതി മരിച്ച സംഭവത്തില് മൂന്ന് പോലീസ് ഉദ്യോഗസ്ഥര്ക്ക് സസ്പെന്ഷന്. രണ്ട് എസ് ഐമാര്ക്കും ഒരു ഗ്രേഡ് എസ് ഐക്കുമാണ് സസ്പെന്ഷന്. സംഭവവുമായി ബന്ധപ്പെട്ട് സിഐക്ക് കാരണം കാണിക്കല് നോട്ടീസും നല്കിയിട്ടുണ്ട്. തിരുവല്ലം പോലീസ് സ്റ്റേഷനിലെത്തിച്ച സുരേഷ് കുമാറിന് ഹൃദയാഘാതം സംഭവിക്കുകയും ആശുപത്രിയിലെത്തിക്കുകയും ചെയ്തെന്നാണ് പോലീസ് പറഞ്ഞിരുന്നത്.
സുരേഷിന്റെ മരണം ഹൃദയാഘാതം മൂലമാണെന്ന് പോസ്റ്റ്മോര്ട്ടം റിപ്പോര്ട്ടിലുമുണ്ടായിരുന്നു. എന്നാല് നാട്ടുകാര് സുരേഷിന്റെത് കസ്റ്റഡി മരണമാണെന്ന ആരോപണം തുടരുകയായിരുന്നു. ഈ ആരോപണത്തിന്റെ പശ്ചാത്തലത്തില് ക്രൈംബ്രാഞ്ച് അന്വേഷണം നടത്തി വരികയാണ്. പോലീസ് നടപടികളില് വീഴ്ചയുണ്ടായെന്ന് ചൂണ്ടിക്കാട്ടിയാണ് ഉദ്യോഗസ്ഥര്ക്കെതിരെ ഇപ്പോള് നടപടിയുണ്ടായിരിക്കുന്നത്.
ഹൃദയാഘാതത്തിന്റെ കാരണം അറിയാന് വിശദമായ ശാസ്ത്രീയ പരിശോധന വേണമെന്ന് പോസ്റ്റ്മോര്ട്ടത്തിനുശേഷം വിലയിരുത്തലുണ്ടായിരുന്നു. ഹൃദയാഘാതമാണ് മരണകാരണമെങ്കിലും ഹൃദയാഘാതമുണ്ടായത് എങ്ങനെയെന്ന വ്യക്തമാക്കാന് കൂടുതല് ശാത്രീയ പരിശോധനാ ഫലങ്ങള് വരേണ്ടതുണ്ടെനന്നായിരുന്നു ഡോക്ടര്മാരുടെ നിലപാട്. തിരുവല്ലം ജഡ്ജികുന്നില് സ്ഥലം കാണാനെത്തിയ ദമ്പതികളെയും സുഹൃത്തിനെയും ആക്രമിച്ചതിനാണ് മരിച്ച സുരേഷ് ഉള്പ്പെടെ അഞ്ചുപേരെ പോലീസ് അറസ്റ്റ് ചെയ്തത്.
നെഞ്ചുവേദനയെ തുടര്ന്നാണ് ആശുപത്രിയിലെത്തിച്ചതെന്നാണ് പോലീസ് പറഞ്ഞിരുന്നു. എന്നാല് പോലീസ് മര്ദ്ദനമാണ് മരണ കാരണമെന്ന നാട്ടുകാര് ആരോപിച്ചതോടെ സബ്കളക്ടറുടെയും മജിസ്ട്രേറ്റിന്റെയും നേതൃത്വത്തില് ഇന്ക്വസ്റ്റ് നടത്തി. സുരേഷിന്റെ ബന്ധുക്കളുടെ സാന്നിധ്യത്തിവായിരുന്നു ഇന്ക്വസ്റ്റ് നടപടി. മെഡിക്കല് കോളേജ് ആശുപത്രിയിലെ മൂന്നാഗ ഫൊറന്സിക് ഡോക്ടര്മാരുടെ സംഘം പോസ്റ്റുമോര്ട്ടം നടത്തി.
