കോന്നി : കോന്നി തണ്ണിത്തോട് റോഡിൽ പേരുവാലിക്ക് സമീപം റോഡിലേക്ക് ഇറങ്ങി നിൽക്കുന്ന തേക്കിന്റെ ചുവട് ഭാഗം അപകട ഭീഷണി ഉയർത്തുന്നു. വനം വകുപ്പ് തേക്ക് പ്ലാന്റേഷൻറെ ഭാഗമായി നട്ടുപിടിപ്പിച്ച തേക്കിന്റെ ചുവടാണ് റോഡിലേക്ക് ഇറങ്ങി നിൽക്കുന്നത്. പേരുവാലി ഇറക്കത്തിന് സമീപത്തെ കൊടും വളവിൽ നിൽക്കുന്ന തേക്കുമരം വളവ് തിരിഞ്ഞ് വരുന്ന വാഹനങ്ങൾ ഇടിക്കുന്ന രീതിയിൽ ആണ് നിൽക്കുന്നത്. അടുത്തടുത്തായി ഉള്ള ഈ വളവുകളിൽ നിരവധി അപകടങ്ങളും നടന്നിട്ടുണ്ട്.
പേരുവാലിയിൽ അടുത്തടുത്തായി ഉള്ള വളവുകൾ വാഹന യാത്രക്കാർക്ക് വലിയ ഭീഷണിയാണ് ഉയർത്തുന്നത്. തട്ടാത്തി കയത്തിന് സമീപത്തെ എസ് വളവിൽ വാഹനങ്ങൾ ഇടിക്കുവാനുള്ള സാധ്യതയും ഏറെയാണ്. കോന്നിയിൽ നിന്നും തണ്ണിത്തോട് ചിറ്റാർ ഭാഗത്തേക്ക് നിരവധി വാഹനങ്ങൾ ദിവസവും സഞ്ചരിക്കുന്നുണ്ട്. തേക്കുമരം അപകട ഭീഷണി ഉയർത്തുന്ന ഭാഗത്തിന് സമീപത്തെ ഓടക്ക് സ്ലാബ് സ്ഥാപിക്കാത്തതും അപകട കെണിയാകുന്നുണ്ട്.