കൊച്ചി : അനധികൃത സ്വത്ത് സമ്പാദന കേസില്‍ ടോമിന്‍ ജെ. തച്ചങ്കരിക്ക് എതിരായ ഹര്‍ജികള്‍ പരിഗണിക്കുന്നതില്‍ നിന്നും ജസ്റ്റീസ് സുനില്‍ തോമസ് പിന്മാറി. കേസില്‍ നിന്നും തന്നെ ഒഴിവാക്കണമെന്ന് ആവശ്യപ്പെട്ട് ടോമിന്‍ തച്ചങ്കരി നല്‍കിയ ഹര്‍ജി സുനില്‍ തോമസ് ആണ് പരിഗണിച്ചിരുന്നത്. എന്നാല്‍ ഈ ഹര്‍ജി മറ്റൊരു ബെഞ്ചിലേക്ക് മാറ്റണമെന്ന് ആവശ്യപ്പെട്ട് തച്ചങ്കരി ഒരു ഉപഹര്‍ജിയും നല്‍കിയിരുന്നു.
അഭിഭാഷകന് വീഡിയോ കോണ്‍ഫറന്‍സിംഗ് വഴി വാദിക്കാന്‍ സാധിക്കുന്ന ബെഞ്ചിലേക്ക് കേസ് മാറ്റണമെന്നാണ് ഉപഹര്‍ജിയില്‍ തച്ചങ്കരി ആവശ്യപ്പെട്ടത്. ഈ ഹര്‍ജി പരിഗണിക്കുന്നതിനിടെയാണ് കേസുമായി ബന്ധപ്പെട്ട എല്ലാ ഹര്‍ജികളും കേള്‍ക്കുന്നതില്‍ നിന്നും താന്‍ പിന്മാറുന്നതായി ജസ്റ്റീസ് സുനില്‍ തോമസ് അറിയിച്ചത്. നേരത്തെ കേസില്‍ നിന്നും ഒഴിവാക്കണമെന്നുള്ള തച്ചങ്കരിയുടെ ഹര്‍ജി കോട്ടയം വിജിലന്‍സ് കോടതി തള്ളിയിരുന്നു. ഇതിനെതിരെയാണ് തച്ചങ്കരി ഹൈക്കോടതിയില്‍ ഹര്‍ജി സമര്‍പ്പിച്ചത്.
