കോന്നി : തണ്ണിത്തോട് റോഡിൽ എലിമുള്ളുംപ്ലാക്കലിന് സമീപം അന്യ സംസ്ഥാന തൊഴിലാളികൾ പുലിയെ കണ്ട് ഭയന്നോടി. കഴിഞ്ഞ ദിവസം രാവിലെ ആയിരുന്നു സംഭവം. നിർമ്മാണ തൊഴിലാളികളായ ഇതര സംസ്ഥാന തൊഴിലാളികൾ എലിമുള്ളുംപ്ലാക്കൽ തണ്ണിത്തോട് റോഡിൽ വന ഭാഗത്ത് കൂടി നടന്ന് നീങ്ങുമ്പോൾ പുലി വനത്തിൽ നിന്നും ഇറങ്ങി വന്ന് ഇവരുടെ മുൻപിലേക്ക് ചാടുകയായിരുന്നു. പുലിയെ കണ്ട് ഭയന്ന് നിലവിളിച്ച ഇവർ സമീപത്തെ വനം വകുപ്പിന്റെ തടി ടംമ്പ് ചെയ്യുന്ന സ്ഥലത്തേക്ക് ഓടി മാറുകയായിരുന്നു. തുടർന്ന് പുലി ജന വാസമേഖലയുടെ ഭാഗത്തേക്ക് ഓടി മറഞ്ഞതായും ദൃക്സാക്ഷികൾ പറയുന്നു. മുൻപും പല തവണ ഈ റോഡിൽ പുലിയുടെ സാന്നിധ്യം വനം വകുപ്പ് സ്ഥിരീകരിച്ചിരുന്നു.
