പത്തനംതിട്ട : വൈദ്യുതി കമ്പിയെ മരം വിഴുങ്ങിയിട്ടും കെ.എസ്.ഇ.ബിക്കു കുലുക്കമില്ല. മാസംതോറും കൃത്യമായി ശമ്പളം കിട്ടുന്നതിനാല്‍ ഇതൊന്നും ജീവനക്കാര്‍ക്ക് പ്രശ്നമല്ല. വൈദ്യുതി എര്‍ത്തായി നഷ്ടപ്പെടുന്നതു മാത്രമല്ല, വലിയ അപകടങ്ങള്‍ക്കും ഇത് കാരണമാകും. ചെറുകോൽ പഞ്ചായത്തിൽ എട്ടാം വാർഡിൽ വയലത്തല തലക്കോട്ടുപടി വീരമല റോഡിൽ രണ്ടു വൈദ്യുതി കമ്പികളാണ് മരത്തിന്റെ തൊലി മൂടിയത്.
ഇവിടെത്തന്നെ 260 നമ്പര്‍ വീടിന്റെ മുമ്പിൽ കയ്യെത്തും ദൂരത്താണ് വൈദ്യുതി കമ്പികള്‍. മിക്ക സ്ഥലത്തും ലൈനിലേക്ക് മരച്ചില്ലകള്‍ മുട്ടി നില്‍ക്കുകയാണ്. ചില വഴിവിളക്കുകള്‍ കണ്ണടച്ചിട്ട്‌ വര്‍ഷം മൂന്നായി. നിരവധി തവണ കെ.എസ്.ഇ.ബി ഉദ്യോഗസ്ഥരോട് പരാതി പറഞ്ഞിട്ടുണ്ടെങ്കിലും ഇതുവരെയും ആരും തിരിഞ്ഞുനോക്കിയിട്ടില്ല. അപകടം ഉണ്ടായിട്ട് രക്ഷാപ്രവര്‍ത്തനം നടത്താന്‍ കാത്തിരിക്കുകയാണ് വൈദ്യുതി വകുപ്പ് ജീവനക്കാര്‍.
