റാന്നി: 29-ാമത് മാടമൺ ശ്രീനാരായണ കൺവൻഷന് പമ്പാ മണപ്പുറത്ത് നാളെ തിരിതെളിയും. ഫെബ്രുവരി 11 വരെയാണ് കൺവൻഷൻ നടത്തപ്പെടുക. എസ്.എൻ.ഡി.പി യോഗം റാന്നി യൂണിയന്റെയും പോഷക സംഘടനകളുടെയും സംയുക്ത ആഭിമുഖ്യത്തിലും ഗുരുധർമ്മ പ്രചരണസഭയുടെയും ഇതര ശ്രീനാരായണ പ്രസ്ഥാനങ്ങളുടെയും സഹകരണത്തിലുമാണ് കൺവെൻഷൻ നടത്തപ്പെടുന്നത്. നാളെ രാവിലെ 6 ന് ഗണപതി ഹോമത്തോടു കൂടിയാണ് ഈ വർഷത്തെ കൺവെൻഷന് തിരിതെളിയുക. തുടർന്ന് വിഗ്രഹ ഘോഷയാത്ര 1245-ാം നമ്പർ കോട്ടമൺ പാറ ശാഖയിൽ നിന്നും ദീപ പ്രയാണം 2072 -ാം നമ്പർ പേഴുംപാറ ശാഖയിൽ നിന്നും പതാക ഘോഷയാത്ര 1182 -ാം നമ്പർ ചിറ്റാർ ശാഖയിൽ നിന്നും കൊടിക്കയർ ഘോഷയാത്ര 3434 -ാം നമ്പർ നാറാണംമൂഴി ശാഖയിൽ നിന്നും കൊടിമര ഘോഷയാത്ര 2252 -ാം നമ്പർ കുടമുരുട്ടി ശാഖയിൽ നിന്നും പുറപ്പെട്ട് വിവിധ ശാഖകളുടെ സ്വീകരണം ഏറ്റുവാങ്ങി മാടമൺ പമ്പാ മണപ്പുറത്ത് എത്തിച്ചേരും.
ഉച്ചയ്ക്ക് 2.30ന് വിഗ്രഹ പ്രതിഷ്ഠ തുടർന്ന് സ്വാഗതസംഗം ചെയർമാൻ കെ വസന്തകുമാർ പതാക ഉയർത്തും. തുടർന്ന് 3ന് നടക്കുന്ന ഉദ്ഘാടന സമ്മേളനത്തിൽ എസ്.എൻ.ഡി.പി യോഗം യോഗം അസിസ്റ്റന്റ് സെക്രട്ടറി പി.എസ്. വിജയൻ അദ്ധ്യക്ഷത വഹിക്കും. സ്വാഗതസംഗം ജനറൽ കൺവീനറും റാന്നി യൂണിയൻ അഡ്മിനിസ്ട്രേറ്ററുമായ അഡ്വ. മണ്ണടി മോഹനൻ യോഗത്തിനു സ്വാഗതം പറയും. ശ്രീനാരായണ ധർമ്മ സംഘം ട്രസ്റ്റ് ജനറൽ സെക്രട്ടറി സ്വാമി ശുഭാംഗാനന്ദ കൺവൻഷൻ ഉദ്ഘാടനം ചെയ്യും. ചെങ്ങന്നൂർ യൂണിയൻ അഡ്മിനിസ്ട്രേറ്റർ സുരേഷ് പരമേശ്വരൻ കൺവൻഷൻ സന്ദേശം നൽകും. യോഗത്തിൽ മാടമൺ കൺവൻഷന്റെ സമാരംഭകരെ ആദരിക്കും.
കോഴഞ്ചേരി യൂണിയൻ പ്രസിഡന്റ് കെ.എൻ. മോഹൻ ബാബു, പത്തനംതിട്ട യുണിയൻ സെക്രട്ടറി അനിൽകുമാർ ഡി, തിരുവല്ല യൂണിയൻ സെക്രട്ടറി അനിൽ എസ്. ഉഴത്തിൽ, വനിതാസംഘം യൂണിയൻ അഡ്. കമ്മറ്റി കൺവീനർ ഷീജ വാസുദേവൻ, വനിതാസംഘം യൂണിയൻ അഡ്, കമ്മറ്റി വൈസ് ചെയർപേഴ്സൺ മണിയമ്മ ചന്ദ്രൻ, വനിതാസംഘം യുണിയൻ അഡ്. കമ്മറ്റി ട്രഷറാർ നിർമ്മല ജനാർദ്ദനൻ, ജി.ഡി.പി.എസ് റാന്നി താലൂക്ക് സെക്രട്ടറി ഇ.കെ മനോജ്, ജി.ഡി.പി.എസ് മണ്ഡലം പ്രസിഡന്റ് പി.എൻ സന്തോഷ് കുമാർ, അഞ്ചു ലത വി.കെ എന്നിവർ ആശംസകളും പറയും. വൈകിട്ട് 5 ന് ഗുരുപുഷ്പാഞ്ജലി, ദീപാരാധന, ജി.ഡി.പി.എസ് വലിയകുളം ചൂരക്കുഴി യൂണിറ്റ് നയിക്കുന്ന പ്രാർത്ഥനക്ക് ശേഷം വൈകിട്ട് 7 ന് പൊൻകുന്നം ഷാജിരാജുവും സംഘവും അവതരിപ്പിക്കുന്ന ഗാനോത്സവതോട് നാളത്തെ പരിപാടികൾ അവസാനിക്കും
