തിരുവനന്തപുരം : പ്രായപൂര്ത്തിയാകാത്ത പെണ്കുട്ടിയെ ലൈംഗികമായി പീഡിപ്പിച്ച കേസില് ശിക്ഷ വിധിച്ച് കോടതി. പ്രതിക്ക് 10 വര്ഷം കഠിനതടവും 50,000 രൂപ പിഴയുമാണ് കോടതി വിധിച്ചത്. തിരുവനന്തപുരം വലിയതുറയ്ക്കു സമീപം താമസിക്കുന്ന ഷമീറിനെയാണ് ശിക്ഷിച്ചത്. ആറ്റിങ്ങല് അതിവേഗ സ്പെഷ്യല് പോക്സോ കോടതി ജഡ്ജി ടി.പി.പ്രഭാഷ് ലാലാണ് വിധി പ്രസ്താവിച്ചത്.
അയിരൂര് പോലീസ് 2013-ല് രജിസ്റ്റര് ചെയ്ത കേസിലാണ് ഇപ്പോള് വിധിയുണ്ടായത്. വിവാഹബന്ധം മറച്ചുവെച്ച് 16 വയസ്സുള്ള പെണ്കുട്ടിയുമായി സൗഹൃദം സ്ഥാപിച്ചതിന് ശേഷം പീഡനത്തിനിരയാക്കുകയായിരുന്നു. പെണ്കുട്ടിയെ കാണാനില്ലെന്ന രക്ഷിതാക്കളുടെ പരാതിയെത്തുടര്ന്ന് പോലീസ് കേസെടുക്കുകയായിരുന്നു. തുടര്ന്ന് നടത്തിയ അന്വേഷണത്തില് പെണ്കുട്ടിയെ കണ്ടെത്തുകയായിരുന്നു.
പിഴയൊടുക്കിയാല് 25000 രൂപ അതിജീവിതയ്ക്കു നല്കണമെന്നും പിഴ ഒടുക്കിയില്ലെങ്കില് ആറുമാസംകൂടി കഠിനതടവ് അനുഭവിക്കണമെന്നും വിധിന്യായത്തിലുണ്ട്. ജയിലില്കിടന്ന റിമാന്റ് കാലം ശിക്ഷയില് ഇളവുണ്ടാകും. കേസില് പ്രോസിക്യൂഷന് 25 സാക്ഷികളെ വിസ്തരിക്കുകയും 20 രേഖകള് ഹാജരാക്കുകയും ചെയ്തു. പ്രോസിക്യൂഷനുവേണ്ടി സ്പെഷ്യല് പബ്ലിക് പ്രോസിക്യൂട്ടര് എം.മുഹസിന് ഹാജരായി.
